Justitia mit de Waag: Is se sülven jugendfrei?

Jugendschutz contra Internet?
Gedankens över dat "Gesett to Schuul un Bistand för uns Jugend in't Internet"

vun Rudi Witzke


Wenn in't Kiekschapp twei sik an de Wäsch gahn, wenn dat Gewäuhl un Anken un Günsen in't Bett jümmer länger duurt, dennso kann ik dor keen "Kunst" bi wies warden.

Ik gah denn in de Köök un drink langsåm een Glas Melk. Vor Johren müsst ik so na 20 bit 30 Minuten rut, nu kann dat al in de iersten fief Minuten sien. Un faken mutt ik twei Glöös verputzen. Orrer tweimaal rut. Un wenn dat denn vörbi is, denn smeert se den Kasten vun unnen bit båven vull Blaut. Dat passeert so bi de Privaten un ok bi de Öffentlich-Rechtlichen, nameddags un åvends, denn, wenn Kinner un Ranwassende sik in alle Rauh den Swien-Kraam un de Quålen anseihn köönt.

Ik weit, wat de annern Upwossenen seggt. "Du büst tau schenierlich un schaam-haftig. Kiek di dat man nau an, dat is Kunst, jawoll Kunst! Du büst so wat vun verklemmt, dat dat al weih deit! Du büst een verdrögte Jumfer!"

Wenn ik maal den Kasten na de Narichten lopen laat, kiek ik mi Mieghäuhner an, wat dat för klauke Derten sünd. Gistern åvend heff ik mi mit de Makaken in de warmen Borne in Japan amüseert.
Blaut un Bettgewäuhl laat ik de, de dat woll nöödig hebbt.


Foto Rudi Witzke

Nu geev dat vör Johren de VHS-Cassetten-Ladens to'n Utleihen. Up de Cassetten weern Filme. Swatte Vörhäng hüngen daal, dat ok keen Ranwassende rinkieken kunn. Un in Bonn arbeidte de Friewillige Sülvstkuntrull. Un wenn en Cassett bloots mit en Tang anfaten kunnst, denn wöörn se sparrt. Se keem up'n Index. Weer ankünnigt, dat de en Straaf kriggt, de Cassetten vun'n Index besitt, överspeelt orrer wiedergifft.

Un dat keem so, as ik dat åhnt harr: Een Jung — sien Vadder weer Tähndokter — bröchte en up den Index stahnde Cassett mit na Schaul; en Liehrer, de nich mit den Video-Afspeler ümgahn kunn, lööt de Schäuler daun. De hebbt sik anseihn, up wat för grugelige Wies Minschen Minschen ümbringen. Ik mutt dat seggen: Dor wöör ünner annern wiest, woans veer Pierd en Minschen uteenannerreten. Dor weer wat loos! Nu wakten de Öllern up. De Avkaatsch vun de Freiwillige Selbstkontrolle hett mi jümmer gaud beraden. De Tähndokter keem nich to de Öllernversammlung in de Schaul. Ik heff em schreven, wat Saak is und dat hei de Cassett bi mi afhålen kunn. Ok nu weern dor bedüden Mitminschen, de mien Reakschoon gegen dat Verstöten gegen Gesette för överdreven hölen. Ik weer woll tau kettelhoorig.

As ik Johre later in Penschoon güng, leeg de Cassett jümmer noch in mienen Schrievdisch. Wi hebbt se na Gesett un Ornung kaputt maakt un en Protokoll över schreven — sogoor mit Segel un Ünnerschriften.

Vöraff harr ik de Rekters un Rektersche över den Schiet informeert, ok över de Anfäng vun Compjuterie. Een Liehrer, de sik besünners utkennte, wöör insett as Berader vun Öllern, Liehrer un Rekters. Na een Johr hett hei de Plünnen hensmeten: Nüms harr wat vun em weiten wullt.

Nu schall dat niegste Jugendschutzgesetz von 2011 an allens beder warden. De Ladens mit de swatten Vörhäng sünd verswunnen, dat gifft keen Videocassetten- Utleihn mir, wi hebbt nu dat Internet un DVD. Wenn Öllern nich weiten, wat ehr Bambusen mit den PC anfangt, wenn se keen Tiet hebbt, denn wöör dat ok nich helpen. Kinner uptrecken is nich lichter woorn. Vele Öllern kümmert sik nich orrer ward von ehr Kinner belågen.


Foto Rudi Witzke

Un so köönt de Junglüüd un Kinner sik allens an Wäuhlerie un Beestigkeit "rintrecken", wenn de Öllern de Sparr in den Kompjuter nich inschalt hebbt. Se weiten meist gor nich, dat dat so wat gifft.

Also mütt en Internet-Gesett her, dat de Anbeiders vun Dusende vun Saken dwingen ward, nau to schrieven, för welk Öller ehr Bidraag is. Un de Sparren mütt nu de Schriever orrer de Fotograaf insetten. Een kann dat ok en Deinst maken laten, de sik dat bannig düür betahlen lett. Un wenn een Fehler maakt? In en Proov hebbt se rutfunnen, dat 80% falsch kenntekent weern. Avers: "In diesem Fall begeht man eine Ordnungswidrigkeit und kann ein Bußgeld von bis zu 500.000 Euro erhalten (§ 20 Abs.3 JMStV-E). Ebenso möglich ist die Sperrung des kompletten Angebotes (§ 20 Abs.4 JMStV-E in Verbindung mit § 59 Abs.3 Rundfunkstaatsvertrag)."

Wi hebbt to eenanner seggt, dat uns all nu een Muulkorv upsett ward. De schull so en elektroonsch Muulfessel för den Brägen sien.

Dissen Staatsvertrag harrn sik de Ministerpräsidenten vun uns Bundslänner utdacht. Geiht ja ok üm en wichtige Saak. De Landdaag müssten noch taustimmen. Dat aver weer in drei Minuten daan. Gesett upraupen, Afstimmen, all den Arm hooch, dat neegst Gesetz. "Dörchwinken!" seggt se in'n Landdag dortau.

Nu is aver in Nordrhein-Westfalen en Minnerheitenregierung. Bautz, stimmten ierst de CDU un FDP un denn alle dorgegen.

Nu dörfft wi bi plattpartu.de wieder Riemels schrieven, Döntjes vertellen, Biller wiesen na de gülligen Spillrägeln. Aver tööv man af: In en Blatt kann een lesen:
"Die jugendpolitische Sprecherin der CDU/CSU-Bundestagsfraktion, Dorothee Bär, scheint Becks (Dat is en Ministerpräsident!) Vorahnung bestätigen zu wollen: "Die CDU/CSU-Bundestagsfraktion wird jetzt an einer schnellen Novelle des Jugendschutzgesetzes arbeiten", kündigte sie an."

Wenn wi aver uns in de Landdaag schickten Lüüd upklären, wat dat för uns bedüüdt, denn is dat nich so licht, un dat Muul to verbeiden. Se hebbt verspraken, Plattdüütsch to schütten un intosetten. Denn aver mütten wi Maten, elkeen up sien Wies, de Minschen upklären, de wi de Updraag geven hebbt, uns to regeern. De köönt vun alleen nich allens weiten.

Ik heff al dit maal alle wichtigen Lüüd in unsen Schleswig-Holsteinschen Landdag schreven, to laat, ik weit. Een Anter heff ik vun een för Plattdüütsch tostännigen Maker kregen. De wüßt bit dorhen vun nix. Mennig Lü hebbt överhaupt nich antert. Bloots een Anter keem fix un weer kompetent. Se keem vun de medienpolitische Sprekersch vun de FDP-Landtagsfraktion Schleswig-Holstein.

Da kannst sehn, wa nödig dat is, dat wi, de dat angeiht, de Politik un de Politikers stüürt.

Een Raat un Bidd to’n Sluss: Öllern, waakt up! Wenn dat in de Stuven vun uns Junglüüd liesing ward, denn frett dat Internet Hart un Seel vun uns Kinner!


Rudi Witzke
de in keen Partei is, se aver för bannig wichtig höllt.

19.12.2010


na baven