Uli: He is ok so'n Würstchen...

Kalles Klocken, Ulis Zocken

vun Jens-Peter Bey

Kennst du Kalle? Dat is de Vörsitter vun den Vörstand vun Dütschlands düürsten Footballer-Club. Dat he allens richtig maken deit, dor passt de Uli för op. Kennst du Uli? Dat is de Vörsitter vun den Upsichtsraad vun Dütschlands düürsten Footballer-Club. Immer, wenn dat üm de Wuss geit, is he dorbi. Immer wenn dat üm den Pott geit, sünd se beid dorbi. Immer wenn de Marios verhökert ward, eerst recht.

Rummenigge und Hoeness sünd good betahlt. Liekers verdeent se sik af un an so'n lütt To-Broot. Beid sünd se Dree-Striepen-Keerls. Se künnt Adidas un Aldidas op de Bost un an de Fööt fein ut'nanner holn! Un mit Neiki hebbt se eerst recht nix an'n Hoot. Hett dat wat mit Ulis Speelgeld in de Schweiz to kriegen? Dat kannst du nich bewiesen!

Nanu, ok op den Football sitt Düütschland glieks blangen de Schwiez?!

Dat Spekuleern schulln wi Zocker-Uli öberlaten. Sien Speelgeld hett düchtig Junge kreegen un is in de Stüer-Erklärung vergeten worrn. De Stüerbehörden harrn keen Humor un wulln em inbuchten. 5 Milljohnen Pand sünd de Pries für dat Frie-Rümloopen. Uli, de Stüersünner, hett sik sülm anzeigt un luert nu op den Bescheed.

Kalle hebbt se ok bi de Büx kreegen. He harr nülichs in Katar to doon. Dat is dor, wo de Petro-Dalers ut de Eer sprütten dot. Wunnerliche Lüüd regeern dor. Hem 'n Handdook op'n Kopp un de Spendeerbüxen an. Dat hett wiss nix mit de Football-Sommer-Sauna-WM 2022 to doon. Trüch to Kalle. Wenn in Katar en dütschen Football-Fründ to Besöök kümmt, kriggt he 'n lütt Andenken mit. Kalle hebbt se twee Rolex opnödigt.

Woso denn bloots twee dorvun?!

...un nu is Sauregurkentied!

De Toll hett sik öber Kalle wunnert, de in de gröne Reeg nix deklareern wulln un sien düüre Dubbel-Rolex liekers in de Handpackelaasch harr. Klocken-Kalle mutt de Stüern nabetahlen. He is ok in sik gahn un will de beiden Rolexe nich beholn. Kalle hett noog goode Klocken in't Schapp. He spendeert de Rolexe för Lüüd, de dat nödig hebbt. Mi kommt de Tranen!

Uns Kaiser Franz sitt in Kitzbühel in't Stüer-Exil un lacht sik 'n Ast. Ehrpusselige Lüüd all tohoop, de Kalle, de Uli un de Franz...