Koffi — un ja nich vun't Weder snacken!

Dat Niegste vun't Weltklima


De mehrsten Saken, de würklich bestimmt, woans dat mit de Welt wiedergeiht, de finnt ja nich in de Öffentlichkeit statt; de warrt achter verslaten Dören regelt. Mennig Lü reegt sik doröver op; man wenn doch mal wat würklich Wichtiges in de Öffentlichkeit stattfinnt, denn hebbt wi dat grote Talent, dat konsequent to ignoreern. Allens Möögliche warrt groot un breed dörsnackt, vun'n Lotto-Jackpott över de niegsten Skandale bet na Olli Kahn sin Afstieg, bloots dat Wichtige nich. So is dat ok mit de UN-Klimakonferenz in Buenos Aires, de vundaag toenn geiht. Wat dor allens los west is — un wat dor nich los west is —, dat köönt Se good op de Websiet vun www.climatenetwork.org nalesen. Dor weetst nich, wat du lachen orr hulen schast. Weer't Theater, denn kunn een Intritt dorför nehmen (dat gellt ja mehrst för de ganze Welt). Man dat is keen Theater, dat is bittere Wirklichkeit... An'n destruktivsten un ignorantesten hebbt sik de USA un de groten Eerdööl-Produzenten ut Nahoost opföhrt. Jüngst Bispill: De UN wüllt de poveren Länner vun de drütte Welt helpen, dat se Sünnenenergie un annere regenerative Energien insetten köönt. Prompt hebbt de Eerdööl-produzeeren araavischen Länner driest feddert, wenn de UN dat dä, denn wülln se — de Eerdööl-Produzenten — avers ok ehrn Verdeenstutfall ersett kriegen, wieldat se denn weniger Ööl verköpen köönt... Is dat vörtostelln? Nee. Is avers wohr. Eer un Weltklima un dormit dat Leven vun Millioonen (orr Milliarden) mehrst povere Lü sünd anschienen de rechtmäßige Beute vun Roofdeerten-Naschoonen un -Konzerne, de sik an beriekert un dat Opper dood liggenlaat. Wi alle warrt dat to spören kriegen.

De Lü vun www.climatenetwork.org geevt ok en dääglichen Rundbreef rut, in den an'n 17.12.04 de nafolgen lütte Satire stunn. Dat is en Bispill för de "Vörslääg" un "Inischativen" vun de USA un de araavschen Länner op de Klimakonferenz; anschienen is dat ok mehr Realität as Satire. Ik heff dat in't Plattdüütsche överdragen.


George un Abdullah laadt in to en "Koffi- un Diskuschoons-Matinee över de Tied na 2012"
(2012 löppt de eerste Phase vun't Kioto-Protokoll ut)

Wannehr: Jichenswenn 2005 (Naueres warrt nich bekannt geven)
Woneem: En "Exxon Mobil"-Tankstell jichenswo in Nebraska (Naueres warrt nich bekannt geven)

Daagsordnung

Klock 9.00: Koffi
Klock 9.30: Mehr Koffi
Klock 10.00: Lütten Snack (NICH över't Weder!!)
Klock 11.00: Eröffnungsanspraak vun Don Pearlman: "Woans een Regeerungen köfft: Den Weg vun't Geld good versteken". Nützliche Raadslääg to de 10 besten Regeerungen, de grad to'n Verkööp staht, un woans een den besten Gegenweert för sin Petro-Dollars ruthaalt un dorbi en witte Weste behöllt
Klock 11.30: Koffi
Klock 11.45: Enkelte Gespreeksgruppen

Grupp 1 (in'n Tankstellen-Shop): Schulln mega-rieke Ööl-produzeern Länner dorför ok noch Geld kriegen, dat se ophaalt, Ööl to produzeern?
Grupp 2 (in'e Autowaschanlaag; wenn't natt is: in'e Telefoon-Eck): Döögt de Koffi hier wat orr schullen wi de Konferenz in't Café verlagern?
Grupp 3 (in't Büro vun'n Tankstellen-Baas): Schallt de USA dat Recht kriegen, de Ümwelt to verdrecken, ahn Konsequenzen un so veel se wüllt?

Klock 12.00: Grupp 2 bericht't över ehrn Snack vör dat Plenum.
Klock 12.05: Plenumsdiskuschoon över dat Koffi-Thema. (Ergeevnisse vun Grupp 1 un Grupp 3 staht al fast: "Jo, na klaar" un "Jo, wieldat Exxon-Mobil dat seggt". Dorüm is to düsse Themen keen Diskuschoon mehr nödig.)
Klock 12.15: Ende.

Vunwegen de keddeligen Themen in düsse Daagsorrnung mööt Lü, de dat schafft, Steed un Tied ruttokriegen, en Inverständniserklärung ünnerschrieven, 'neem se sik in verplicht't, nix över den Inholl orr de Beslüss vun dat Drepen to verraden — nich an annere UN-Foren, nich an de Medien, ehr Frünnen, Familie orr den Mann in'n Kiosk an't Eck. Wokeen dorgegen verstött, mutt sin eerstboren Kinner as Pfand hinnerleggen. Utnahmen sünd de Beslüss vun Grupp 1 un 3; se brukt nich geheim hollen warrn, sünnern dröfft öffentlich verkünnt un bejaht warrn. Bloots Kritik is verbaden.


Marlou Lessing


na baven