Klosterbröder, Ballettrotten un Twitter-King:
Flietige Komödi-Makers

vun Jens-Peter Bey


Wo du ok hinkieken deist op de Welt, allerwegens sünd die Komödi-Makers togang. Nich blots in't Witte Hus is Kinnergeboortsdag mit "Füer un Fury". De CSU-Party in Kloster Seeon kann sik ok sehn laten. Klausur heet dat, wenn de Krawallbröders ünner sik tohoop sünd un se de Welt Kuraasch wiesen wüllt. Dor geiht dat meist hoch her. Keen nich pareern deit, kriggt de wat vun Vitali Klitschko an de Mütz? Wat hett he sünst dor to söken? Bi den Oberbörgermeister vun Kiew wüllt sik de Christsozialen kommunalpolitische Kompetenz afkieken, glöv ik.


Seehofer is Kloosterbroder worrn! Nanu — fröher güngen Monarchen doch eerst in't Klooster, wenn se...

Wenn de lange Horst sik in Seeon rünnerdükert un sien Krakenarms üm so'n lütt Minsch schlängeln deit, denn is dat nich de Kanzlersche. Nee, dat is de K.-u.-k.-Diktater-Verschnitt Viktor Orban ut Ungarn. He kriggt dörch Seehofers Ümfaat-Grabbelee sachs Serotonin satt, aber blots noch knapp Luft. Dat beten Luft reckt jüst, üm gegen dat friee Europa to pöbeln. För den Blootdruck vun de Kanzlersche un vun Europa-Schulz is dat wiss nich good. Düsse Schnacks bringt Bombenstimmung. Dat Sondeern un Koaleern ward nich lichter dörch düssen gediegenen Fründ.

Vun Orbans Paprika-un-Peper-Politik künnt de Dütschen sik fix afkieken, woans dat wiedergahn kann in en vörmalige Demokratie. Bitieden schull de CSU ok glieks den lütten Kaczynski ut Polen för 2019 anfragen. Denn hebbt se meist all de Butenkompetenz vun de Demokratie-Würgers tohoop. Bi de Binnenkompetenz kann man to rechte Tied noch nabetern: Höcke kümmt villicht geern, wenn Gauland de dünne Luft in de Bayern-Bargen nich afkann.


...to Afdankung dwungen weern?!

Alexander Maut-Dobrindt is dat gröttste Snackfatt vun den ganzen Vereen.
Veer Johr Nixdohn in't Verkehrsministerium hett em bannig schlaucht. Aber as de niede Lannsgruppenvörsitter vun de Christsozialen in Berlin is he nu wedder vull Tatendrang. In dat Kloster gifft he de Exorzisten-Rull. He will die 68er-Düvels utdrieven un den Sozialismus över de Kant kicken. Sien "bürgerlich-konservative Wende" steiht momentan dringlich an. Jungedi, de Mann hett Ideen! Un dat so fix na all de Johrn Sozialismus in uns Bonn-Berliner Republik.

In Seeon prövt Dobrindt ok sien anner Rull as Slachterhund. Kläffen kunn he al as Generalsekretär, beter noch as Stoiber un Söder un veel beter as Scheuer. De hett ünner de deepdinkerschen Politstrategen noch Welpenschuul. Eerst tobieten un denn nadenken is ehr Geschäft, un dat kann Dobrindt allerbest. Villicht kriggt he achterna ok dat lierlüttje Kunststück fardig, en Kabinett mit de Sozis tosamentoklütern. Mit "Muddi" schull dat keen Malesche geben. Wohre Fründschaap deit nie nich dümpeln.


Amen.

In Stuttgart is allens anners bi de Liberalen, nich so klösterlich. Meern op de Bühn in dat Württembergische Staatstheater is Krischan Lindner togang, uns düütschen Macron-Verschnitt. Dat Mikro vun't Headset is meist ut de frischen Hoor rutwussen bit ran an't Sabbel-Lock. He jackelt rüm as Steve Jobs bi de Vörstellung vun dat niede iPhone. Dünamische Körperspraak is dat. De kann man bruken, wenn an Dreekönig FDP-Bilanz trocken ward. "Beter nich to regeern, as verkehrt to regeern" hett Mr. Fiftyfifty na veer Weeken Jamaika-Verhanneln seggt. Naja, sien Weglopen is nich so fix to verkloorn, wenn vörmals anseggt weer, dat veeles anners und beter warrn schull. Dor mutt nu Edel-Schnackeree her: Sööthult raspeln, opplustern, rümgockeln, angriepen, begöschen. Un dat kann he, de Krischan. He is 'n fixen Dutt un nich op'n Kopp fullen. Sien Lüüd fiert em so dull, dat man meist meent, Krischan kann ok öber't Water lopen. Ganz so wiet is dat noch nich. Sien Fans mütt dormit tofreden sien, dat de Vörsitter Krischan Lindner un de Fru General Nicola Beer dor baben rumküselt as Swaans in den Trippeltrapp Swaansee vun't Stuttgarter Ballett. Dat is de liberale Pas de Dö, blots de Tütü fehlt.


"Ik will ok so'n Job as Trump! Wo ik nix könen mutt as bloots twittern!
Un mi dat Geld in de Tasch steken! Un mien Lobbys riek maken!
Un ik will ok solk Hoor as he! De laat ik mi as neegst inplanten!"

Ik weet nich, wat Donald Trump in Washington D.C. jüst maken deit. Hett he hüüt twitterfree? Dat kann ik meist nich glöven. Villicht lött he sik een, twee Sieden ut dat niede Book vun "Füer un Fury" vörlesen? Ik glöv, dat is bilütten al en Bestseller un hett doch mit dat swatte TV-Fury-Peerd ut de Kinnertiet nix to doon. Dat is en anner Geschicht. Blang de Bookdeckels is nix as gräsige swatte Komödi. To licht kann dor miteens en Tragödi bi rutsuern...


Foto Seehofer: Ralf Roletschek / Roletschek.at
Foto Lindner: Martin Rulsch, Wikimedia Commons
8.1.2018


na baven