Kuddel, Schauermann ut Hamborg, bekiekt de...

Drütte Wahl


KuddelWeer dat en Krimi! Dramaatsch as en Footballspeel vun uns Nationalmannschaft!", stöhn Kuddel. "Nu hebbt wi so lang vör de Glotze seten, dat wi en Sluck Schampus verdent hebbt!" He gung to'n Köhlschapp un nehm de Boddel mit an Disch.
Bertha triumphierte: "Ik heff de Wett wunn un du kriggst blot en Sluck to'n nippen!"
"Ja, hest du! Aver dat weer ganz knapp!"
"Ik heff di glieks seggt, dat dien Joachim kene Chance hett!"
"Harr de Linkspartei us nich hangen laten, weer ik de Winner!"
"Wat du jümmers mit de Linken hest?!", see Bertha böös. "De hebbt jüst al in Bayern de Fro Ypsilanti nich wählt!"
"Dat stimmt nich!", weddersprook Kuddel. "Dor hest du wat in'n verkehrten Hals kregen! Aver dat wunnert mi nich. Ik weet ja, dat du vun Politik keen blassen Schimmer hest! Aver mit de Geographie is dat ok nich wiet her! Dat weer nich in Bayern, sünnern in Hessen!"

Bertha müss benaut smuustern. "Dorüm verklor mi mal, worüm dat bie't eerste un tweete Maal nich klappt hett un bie'n drütten Wahlgang de afsluut Mehrheit tosamen keem?"
"Wiel 44 Lüüd ut de Koalischon Wulff nich wählt hebbt!"
"Un worüm hebbt se em bie't drütte Maal de Stimm geven?"
Kuddel lach. "Wiel Wulff drütte Wahl is! Nee, dat weer Spaaß! Dat gung minner üm em as üm Merkel un Westerwelle. De sünd untofreden vunwegen Angelas Swackheit to föhren. Un Westerwelle weer blot in de Opposischon goot. He is en Muulheld un Opportunist! Un denn hebbt se natüürlich to allereerst an sik sülven dacht! Se harrn den Ast afsaagt, op den se sitten dään. All sünd se ümfallen, Parteidisziplin weer wichtiger! Se hebbt nich na jemmer Geweten afstimmt, as de Verfaten dat will, sünnern ut Egennütten! Liekers Joachim Gauck as Publizist, Börgerrechtler un Beopdragte för de Stasi-Akten de betere Kandidat weer!"
"Dat mit dat Geweten steiht dor binn?!" Bertha weer baff.
"Ja, dat kann ik di schwatt op witt wiesen." Kuddel gung to'n Bökerregal un keem mit dat Grundgesett torüch. He blädert en Moment un see: "Ik heff dat funnen. Artikel 38 : ‚Die Abgeordneten des deutschen Bundestags sind Vertreter des ganzen Volkes, an Aufträge und Weisungen nicht gebunden und nur ihrem Gewissen unterworfen.' — Wenn Wulff dörfulln weer, weer de Regeern an't Enn. As en Explosion weer Schwatt/Geel utenannerbraken! De Super-Gau! Nee, de Super-Gauck!"
Bertha weer fuchtig un anter: "Denn hebbt ja 44 Afordnete gegen ehr Geweten stimmt!"
Kuddel lach. "Wenn du in de Politik geihst, schallst du dien Geweten an de Garderobe afgeben!"
"Na ja, is ja ok egal! Herr Wulff is doch en propper un sympathisch Minsch. Inne Bild-Zeitung heff ik leest, dat achtig Perzent vun Froonslüüd mit Döchter em geern as Swiegersöhn harrn."
"Dat kann ik verstahn. Achtig Perzent vun de Bildzeitungsleser stimmt för den Mann ahn Ecken un Kanten, de blot Stevigkeit hett un stuur is! In Neddersassen hett he tweemal gegen Schröder verlaren un na negen Johr in'n drütten Anloop dat schafft, Ministerpräsident to warrn. Hüüt hett dat blot negen Stünnen duert!"

Bertha harr de Sektglöös holt un Kuddel opend de Boddel. He drünk sien Glas halfleddig un see: "De Linken hebbt sik nich wannelt. Ümmer noch de glieke Seilschap ut Stasi-Agenten un Denunzianten!"
"Ischa nu egal!", see Bertha sinnig. "Ik heff tominnst mien Wunschkandidat dörkregen!"
"Ja, du hest em dörkregen", Kuddel lach höhnsch. "He warrt jüst so blass blieven as vele anner Präsidenten. Goot weern blot Heuss, Heinemann un Scheel. Un de best weer Richard von Weizsäcker!"
"An ‚Papa Heuss' kann ik mi ok erinnern", anter Bertha un müss smuustern. "De harr sonne sonore Stimm." Un na en Denkpaus see se: "Aver en Gooten hest du vergeten! Willy Brandt weer doch en allerbeste Präsident!"


Martin Ripp

5.7.2010


na baven