Maat Jan ut BremenMaat Jan hett mal wedder Landgang hatt un hett glieks in de eerste Spelunke sin Gedankens to Papeer bröcht:

De politische Kannegeeter


....is een ool plattdüütsch Theoterstück öber een eenfachen Handwarker in een lütt Dörp, de sick op eenmol in'n Kopp sett, Politiker to warrn. Bet dorhen het he de Melkkannen för de Buurn rund ümto mokt, man för so een profaane Orbeit is he sick nu veel to fien för. Dat markt ok de Lüüd in sin Dörp.

Kannegeeter un "Politicus", dat geiht man slecht tohoop. "Wenn he hüttodaags noch mol een Kanne geet, denn süht de so politisch ut, dat een de gor nich mehr richtig bruken kunn."

Ober mit 'n poor anner heel kloke Lüüd ut't Dörp gründt he een Partei: De "Christlichen Radikal-Demokraten". Un ohn dat se öber jichenswatt een Ohnung, een Programm oder sogor een Meinung hebbt, schafft se dat jichenswie bet in't Parlament. Bloots dat em keen gescheiten Minsch mehr för vull nehmen deit, un an't Enn steiht he alleen dor.

Dat "Kannegeetern" is dormols een ganz bekannten Utdruck weest för — tomeist politische — Klooksnackeree. Dat Wort kennt hüt keen Minsch mehr. Ober nu hebb ick faststellt: De Kannegeeter sünd merrn ünner us!

Martin heet een dorvon, un de is sogor Präsident von de Orbeitgevers inne Metallbranche. Nojo, mit Metall hett he as Kannegeeter jo all jümmers to doon. Bloots dat he eben ok to wat Högeres beropen is, un dorüm schachert he nu mit de Gewerkschafter un schnackt von flexibiliseern, Hans-Jörg Kannegeterliberaliseern, moderniseern un wat nich allns.

De anner Kannegeeter het Hans-Jörg mit Vörnomen un kiek an — he hett dat ok bet in't Parlament bröcht, as sin literarisch Vörbild. In'n Landdag in Sachsen sitt he vör de "Christlichen ...Demokraten". Mark op, nich "…Radikal-Demokraten", dat is heel watt anners, un öberhaupt is dat ok hüttodaag nich mehr fien, "radikal" to ween.

...nu noch KÖHLer!De Kannegeeter starven woll nie nich ut, bloots dat een dat tomeist nich an'n Nomen marken kunn. Apropos Nomen: Da kunn een veel von lernen, ton Bispeel, dat een lütte Dieb een "Diepgen" is un een lütte Schill, dat is een "Schily". Un de Union (dat is de Partei, von de ik jüst schnackt hebb) hett nu ok lernt, dat se "Kohl" noch steigern kunnen: "Köhl-er".

Dat weer een dullen Slogan: "CDU — nu noch Köhler!" Ober een Slogan brukt se jo nich, un ok de SPD mit eern Schwan-engesang nich ("Gesine Schwan — nu noch unbekannter!"), denn dat is jo keen richtige Wahl, dat geiht jo üm nix, he wart jo bloß Präsident.

Au weia, nu fang ick al sülbs an mit de Kannegeeteree. Nu is ober Fierobend! "Über all das Kannegiessern vergesst ihr ganz den Wein!" (Goethe, "Egmont", 1. Akt, 1. Szene)

Dat schall mi nich passeern!

Prost! Joon

Maat Jan




na baven