Maat Jan ut BremenMaat Jan bewunnert de

Gipfel-Stormer


Dütschland hett en Fründ. Tominnest eenen groden Fründ hebbt wi in't Utland. De heet Manuel Barroso, is ut Portugal, is Präsident vun'ne EU-Kommission un en bannig grode Fründ vun us Dütsche. Dat kummt veelicht dorher, dat he ok anners mennichmol so'n beeten snaaksche Ideen har. Kohl un Freden? Woso nich? Kohl is dat freedlichste Grööntüüch, wat't gifft!To'n Bispill har he vörslogen, Helmut Kohl schall den Fredensnobelpries kriegen. Kohl un Freden, dor mutt een ersmol up komen.

Un nu har he gau in sin Terminkalender keeken un woor wies, dat dor in'n Mai noch twee Dog free wern. Fors har he en europäische Gipfelkonferenz ankünnigt, üm över de Tokunft von de Europäische Verfassung to beroten. Dat Dösige wer blots, dat vun disse Gipfelkonferenz kineen wat wusst har, nüms wer inlodt oder ok blots informeert ween, un nu sünd se al knartschig, dat Barroso jüst se nich har mitspelen loten. De rudert nu trügg, he har gor kine "offizielle" Konferenz meent, he wull blots mit den Pöttering von't EU-Parlament (düütsch, CDU) un mit us Angela (ostdüütsch, CDU) schnacken, alle annern kunnen tohus bleven. Dree konservative Dütschland-Fans plonen unner sick de Tokunft von Europa. So en Konferenz is wohraftig de Gipfel.

I have a dream...

En echten Gipfel kriegt wi dit Johr ok noch, den von de G8. Un dormit har use tapfere Polizei al fix to don. Mit 900 Mann har de nu överall in Dütschland nor Mitglieder vun de "Militante Gruppe" söcht. Disse "Militante Gruppe" besteiht twoors blots ut 3 Personen, von de twee al över 60 sünd (de Drütte militante Gruppe op den Gipfel?is 56), ober een kunn jo nich vörsichtig noog ween, je oller je doller, dor sünd 900 Mann jüst noog dorför.

Dat Problem mit Razzien vör en Gipfel is jüs datsölbe as mit den Gipfel sülbst: Een kunn dat nich all recht moken. Jümmers föhlt sick een Koppel Lüüd översehn un trüggsett. So ok nu: "Dat heele Spektrum von G8-Kritiker warrt kriminaliseert", hett sick nu ATTAC beswoort, "blots wi nich! Worüm hett kineen us dörsökt? Wi wullt ok dorto hörn." Dorbi is jüst ATTAC en heel gefährliche Trupp. Dat siggt een al doran, dat nu ok Heiner Geißler ATTAC bitreden is. Desölbe Geißler har inne 80er Johr de Fredensbewegung "de 5. Kolonne vun Moskau" nöömt. Wat is he denn nu? Kolonnenföhrer? Putin ward sick wunnern. Un Geißler kunn sick jüst so god glieks bi de "militante Gruppe" bewarben. Old noog is he jo.

Militante Rollifohrer...? Stimmt dat?Tominnest wiest wi dit Mol de heele Welt, wat wi an besten köönt: Muern, Tüün un Droht in irgendeen gottverloten Gegend upstellen. Bannmeile staats Fanmeile. Kin Summermärken, sonnern een heel normale dütsche Albdrom. Dat is Eventmanagement Marke Wolfgang Schäuble.

Op annere Rebetten weer Schäuble nich so fix. Dor har he jo de Idee hatt, over dat Internet private Computers uttospioneern. Een poor Weken wart över diskuteert — un denn kummt rut, dat de Geheimdeenste dat al lang don, wieldat sin Vörgänger dat al anordnet har. So schwor is dat, noch konservativer as Schily to ween.

Stimmt de Toonart?Ober över den "European Song Contest"-Schlogergipfel (fröher "Grand Prix") segg ick op best gor nix. Dat Thema is mi veel to brisant. Wenn een blots de Slagzeilen disse Doog lest, meent een jo, wi sünd jümmers noch in'n kolden Krieg: Vun een "Balkan-Mafia" ward dor schnackt, vun "kolden Schloger-Krieg" un vun "Seilschaften". Dat wi in Football nich Weltmeister worn sünd, weer jo al schwor to begriepen. Over dat disse Ossis nich mol use Schloger lieden köönt, dat geiht to wiet! Wi hebt jo ok Karel Gott johrelang erdüllt. Klor, dat dor irgendeen Schummelee dorachter steckt. Un sowat doot wi jo nienich. Blots wenn Stefan Raab un Gildo Horn in Wohrheet heel demokrotisch vun't düütsche Volk wählt worn sünd — denn is dat för us noch schaneerlicher as jede Schummelee.

Un noch een Gipfel geiht disse Dag los: De Johreskonferenz von de Weltgesundheetsorganisation WHO. Dor geiht ünner annern üm en Krankheet, de bi us binoh kin Thema mehr is: Tuberkolose. Jedeen Johr starben 9 Millionen Minschen dor an, wieldat de Erreger gegen de olden Mittel resistent worn is. TStimmt de Kohle?rotzdem gifft dat keene neden Medikamente un wart wohl ok in fiev Johr noch kin geven. De Grund is, dat de Opfer binoh all in Afrika un Asien levt, un de hebbt kin Geld, folglich kunn een ok an nede Medikamente nix verdienen. Un wenn dat nede Mittel gifft, denn sünd de so düür, dat de, de se bruken, se nich betohlen köönt — so as bi HIV in Afrika. So'n Pharmakonzern kunn jo nich eenfach losgohn un sin "geistiges Eigentum" verschenken. Dat Leven vun de Kranken is also sotoseggen dat geistige Egendom vun de Pharmakonzerne. Dat kummt veellicht mennicheen Afrikaner von fröher her bekannt vör.

Over dat schall nu nich gegen de Pharmaindustrie gohn. Nix gegen de! Up annere Rebetten sünd de nämlich fixer, as een glövt. To'n Bispeel bi'n Radsport. So gau kunnen de Kontrolleure gor nich kieken, dor har al wedder en Radprofi de Spritze iStimmt de Chemie?n't Been. Een Glück, dat de nich all "Jan" heeten. Un mit ehrn eegen kontamineerten Blut gespritzt, suust de as een dopten Blitz op jedeen Barg-Gipfel. Nu wunnert mi ok de Fohrstil vun de Fohrrad-Kuriere in use Binnenstäder nich mehr. De hebbt wiss keen "Red Bull" in ehre Satteltaschen, sonnern hebbt sick nor en Techno-Party ehr egen Blot avnohmen un dat nu, tosomen mit Eenweg-Spritzen, jümmers dorbi. Un so todröhnt kümmert een de heele Verkehr üm een rüm nich mehr.

Wi lernt also: Sport is gesund — so lang as de Chemie stimmt!

Dat seggt ok

Maat Jan



na baven