Maat Jan vertellt...

De Wohrheet över Nicolas S.

Wat is dat för en Kerl, hebb ick mi jümmers frogt, de dor nu in Paris regeert? Wat för een Minsch is he? Nu is de Wohrheet rut: He is överhaupt kin Minsch. He is een Eydeet.

Dat hett sine neede Fro, dat Model Carla Bruni, nu verroten. In en Interview har se seggt, eer Mann har "fiev oder söss bannich fruchtbore Bregens." Wo kunn dat ween? En Minsch un en Tier hett jo jümmers bloß een Bregen, een Gehirn — oder gor keen, as de Insekten.

Üm dat to verstohn, mööt wi een Klassiker ut de neede dütsche Literatur rantrecken: Walter Moers sin Book "De 13 ½ Leven vun Käpt'n Blaubär". In sin sessten Leeven geiht de Verteller in en besünner School. Sin Lehrer heet Dr. Abdul Nachtigaller un is en Eydeet. Eydeeten sünd Wesen mit dree oder mehr Bregens, de dorüm mehrst ok plietscher sünd als all de annnern Levensformen up disse Welt. Dat passt to Sarkozy sin Selbstbewusstsein. Man sin vulle Intelligenz kunn en Eydeet bloß bi deepste Düüsternis entwickeln. Licht stört sine Bregens bi de Orbeit. He is also jüst de rechte Mann för dunkle Geschäfte. Un jedeen Bregen het sin eegen Spezialgebiet. Bi Sarkozy is dat wohrschienlich so:

• Een Bregen is bloß dormit beschäftigt, em to vertellen, wat för een dollen Kerl he is.
• Een Bregen luert jümmers op de nächste Möglichkeet, sine Wähler to beleidigen, un
• een Bregen kunn sick nich entscheiden, wat he Casanova oder Charles de Gaulle ween will.

Komisch is bloß, dat Fro Bruni meent, sine Bregens ween ok noch "fruchtbor". Vermehrt de sick villicht noch? Wat för Koppgeburten dor woll noch rutkomt, wi sünd nieschierig.

Wo veele Bregens Willi Reinhart sin eegen nömen kann, weet wi nich. Jedenfalls har dat för den Schwoben langt, en Book to schrieven, dat "De Spätzle-Botschaft" heet. Un dorför is he nu Bundes- un Europaminister in Baden-Württemberg worn, üm sin "Botschaft" överall to verkünden. Betherto har he twors bloß in't Finanzministerium orbeet, man de Wessel kunn för en Eydeeten kin Problem ween: fix een Bregen utwesseln un fertig. Dorför is en Herr Stächele Finanzminister worn, de mit Finanzen noch nienich wat to doon hatt hett. Un dat allns bloß, wiel de grode Ministerpräsident Öttinger sin olen Finanzminister Stratthus loswarn wull. De wor nämlich kompetent, har grote Künn un weer ok noch beleevt bi de Minschen — so een kunn Öttinger nu mol nich blangen sick utstahn.

Dat Angela Merkel ok kin blangen sick wull, de to klok is, weet wi al lang. Man de SPD mokt eer dat eenfach un sett Kurt Beck an ehre Siet — mit em har se dat Problem nich.

Wo bi de SPD de Bregen sitt, is noch nienich klor worn. Nich dat se kin Hirn harrn — in Gegendeel, se hebbt Hunnerte, sogor Dusende Bregens; dorför sünd de all 'n beeten lütt, as wenn dor mol een Bregen-Urknall west weer, un siet de Tied wedersprekt un striet sick de ganzen lütten Bregenpartikel gegensietig över allns. Villicht kunn jo Gesine Schwan de Bregen vun de Partei weern. De hett Erfohrung in utsichtslose Positionen.

Wenn Se nur frogt, woneem dor de Sinn is — de is natürlich, as jümmers, in München. Veellicht nich bi de CSU, dor kunn een lang söken, ober Sinn is noch dor — Prof. Dr. Werner Sinn, de Chef von't ifo-Institut för Wirtschaftsforschung. De har nu weetenschaftlich faststellt, dat Dütschland en Utwannererland is. Need is de Erkenntnis nich, al för hunnert Johr un fröher sün Lüüd utwannert — ober nu, seggt Sinn, sün dat de Leistungsträger, de Besten un Gebildetsten, de utwannert. Un dorför har he ok een weetenschaftlichen Bewies — he sülbs is nämlich noch dor.

As Seemann is unsereen jo sowieso jümmers in Utland ünnerwegs un tellt dorüm nor Sinn to de "Elite" un de "Leistungsträger" in use Gesellschop.

Un dat hett eegentlich al jümmers seggt

jo Maat Jan