Maat Jan ut BremenMaat Jan röppt:

Go Geißler Go!


Wat is egentlich mit de Araber los? Hett de nich bither en fien ruhig Leven hatt, hett us sin Öl verköfft, wat vun sülbs ut de Eer sprudelt is, hett sick mit dat Geld een Palast in siene Oase buut und sick dat ünner en Dattelpalme good gohn loten. Oder?

Jüs so eenfach is dat veelicht doch nich ween; worüm weern anners so veele arabische Jungs in de letzen Johren so füünsch up us un use Gesellschop, dat se sick sogar sülbs in de Luft sprengen dään? Dat hett us nich passt, is jo klor. Over nu geiht de Araber nor wieter: Nu wull he op eens en Demokratie bi sick tohus.


Sünd de Lü würklich bloots dumme Kamele?

Dat geiht nu doch en beeten wiet, meen ick. De Araber har jo al Öl, Kamele, Pyramiden, en Harem un heel veel Sünn, nu ok nor Demokratie? Een kann jo nich allns hebben.


Stopp!

Un doch geiht dat disse Dag bannig rund in Tunesien, Jordanien, in Jemen un vör all in Ägypten. De Lüüd sünd op de Strot un protestiert, se wulln ehrn olen Präsidenten nich mehr. Obwohl siene Ministers seggt, dat geiht nich, he möt nor dat Gesetz noch söven Maand in Amt blieven. Dat erinnert son beeten an dat, wat Stefan Mappus jümmers över Stuttgart 21 seggt: Dat kunn jo nich ween, dat en Regeerung ehr Entscheidung ännert, bloß vunwegen dat son poor Millionen Lüüd dorgegen demonstreren!

Un de Präsident sülbs hett ok seggt, dat deit em leed: He wull jo aftreten, kunn over nich, wieldat anners mach op End nor "Chaos utbreken". Dor mach sick woll mennicheen Ägypter in siene Stadt ümkieken, de Krawalle, de Doden, de Plünnerungen un de total daalliggende Wirtschap ankieken un denken: Bloß god, dat wi noch kien Chaos hebbt!


Kamele hebbt wi in Europa noog!

In so en Tied bruken wi vör al kloke, wietblickende Politikers, de de Teken vun de Tied erkannt hebbt un fix handeln doot. För us Europäer is dat de EU-"Butenministerin" Catherine Ashcroft. De meent ok al to weeten, wat nu wichtig is: dat Opposition un Regeerung "tohop vöran goht". Bloß schaad, dat de dusseligen Ägypters dat jüs nich wullen. Gohn schall dor bloß een, un dat is ehr Präsident.

Ok wenn dat sin Fründ Berlusconi nich freit, de Mubarak för ehn "wiesen Mann" höllt. Kummt jümmers op an, mit wokeen he em vergliekt! Veellicht mit sin needen Fründ Ghaddafi, de Revolutionen in sien Norborland ok nich komisch findet? Wenn wi söke Dörblickers as Ashton as "Butenminister" hebbt, denn könt wi för Ghaddafi ok en scheunen Titel findet. Worum nich: "EU-Flüchtlingsbeauftragter"? Un en "wiesen Mann" as Mubarak könt wi jümmers bruken — wenn siene Lüüd em nich mehr wullen, denn gilt wedder dat ole Motto: Schick den Opa nor Europa!

Is jo nich so, dat wi bloß wat ut disse Länder nehmt un nix geven doot. Wi kunnen us ok revanchieren. Ägypten brukt kien Reformplan, kien Militär un kien El Baradei. Ägypten brukt bloß eenen: HEINER GEISSLER!!!


Oase för Geißler un Mubarak

De flüggt den nor Kairo un vertellt Mubarak so lang Märken ut 1001 Schlichtungsrunde, bit se beed tohop freedlich inslopen sünd. Un denn kunn dat Volk se heel sutje ut eern Palast rut dragen un in irgendeen Oase ünner en Dattelpalme setten. Un wenn se nich sturben sünd, denn holt se sick nor hüüt för unverzichtbor.

Jüs so as

Maat Jan



na baven