Maat Jan ut BremenMaat Jan denkt na öber

Angie alleen tohus


Hebt Se de Kanzlersche disse Dag mol sehn? Gor nich god sicht se ut, wittschnut un noch wat knödderiger as anners al. As ob ehr een dat Blod ut'n Liev suugt het. Un sowat vun de Aart is dat jo ok ween, wat ehr an Wahldag in Neddersassen passeert is. Dor het se siet Weeken Wahlkampf mokt för ehrn lütten Fründ David McAllister un jümmers predigt "Eerste un tweete Stimm för de CDU!" — un denn dat. Ehr Wählers pareert up eens nich mehr. Un mokt jüst dat, wat Mutti em verboten het. Un al wedder het se een Fründ weniger.


Weil is nich Merkels Typ? Klaar, äh — een Langweiler un een Langweilersche, de passt doch nich tosamen! Bild Weil: Ralf Roletschek/Wikimedia Commons, Bild Merkel: BMI/Hans-Joachim M. Rickel

Wunnen het dorför Stephan Weil, en Verwaltungs-Fiffi ut Hannover, de wegen sine spannenden Reden ok Lange-Weil nöömt wart. So gor nich Merkel ehr Typ, jüst so wenig as de neede Präsident vun Frankriek. Wat weer dat schoin mit eeren lütten Nikolas, wat het se över em lacht. Un nu? Nu wart Frankriek vun Holland regeert un de Rieken flücht al ut dat Land, al vöran Gerard Depardieu. He, de mol Cyrano speelt het, wiest nu sin Land en lange Nees. 1492 hett he noch een neede Welt entdeckt. Un wat entdeckt he nu? Belgien! Man to sin Glück har he noch echte Fründ so as Vladimir Putin, de het em fix to' n Ehrenrussen ernannt. Bloß för eenmol Rasputin speelen. Wi wullt hopen, dat he nich ok enden deit as Rasputin. Ober dat en Stüürflüchtling, de vun de Sozialisten weglöppt, jüst in Kreml Toflucht finnen deit, har ick min Levdog nich belevt. Dorbi is he nich alleen. Ok Brigitte Bardot wull nor Russland utwandern, wo de Lüüd ehre Elefanten leven lot, ehre Möpse bewunnert un ehre Kröten bi ehr lot. Dor fallt mi bloß noch dat in, wat Depardieu sine letzte grode Roll seggen de: "De sünd maldösig, de Gallier!"


Hm, ja, äh, is lupenrein!

Freien wart sick doröver de ole Frunverstoher Gerhard Schröder, wenn he in Moskau so en charmante Norborschop kriggt. Man god, dat sine Doris wiet weg in Hannover in Landdog sitt. De Lüüd harn ehr twoors nich wählt, ober wat schallt, dorför gifft dat jo Landslisten. Sowat nenn ick en lupenreine Demokratie!

Un över al wacht alleen us grode Över-Mutti Angela. Sogor eer Fründ Joe Ackermann hett se verloten. Wat is dat för en romantischen Ogenblick ween, as se sick dat erste Mol sehn hebbt un he to ehr seggt het "Goden Dag, Josef Ackermann, Global Player!" un se "Goden Dag, Angela Merkel, Global Payer." Ober nu is dat vörbi, nich mol sin ole Bank wull em noch in Upsichtsrot hebben. De Vörhang fallt, dat Licht geiht ut un irgendwo singt lies Jimmy Hendrix: "Hey Joe, where are you gonna run to now?"

Un noch een ole Fründin vun Merkel is bös an wackeln: Annette Schavan, de Bildungsministerin. Wat för en Bildung wull de egentlich us Kinner bibringen, wenn se sülbs de eenfachste Regel ut de Grundschool nich begrepen het: Bi't Afschrieven nienich erwischen loten!


Mein lieber Schavan — allens bloots Pappmaché!


Na, wo wied kriggt he de Partei rünner? 20%?

Angies ole Finanz-Fiffi Steinbrück schwört ok Steen un Been, dat he nich noch een Mol mit ehr tohop regeeren wull. Bi't eerste Mol het de grode Koalition sine SPD jo bit op 24% runnertreggt. Man dat kunn Steinbrück ok alleen: Disse Dag sünd se wedder op 24% afsackt. So lang as sin veel beschworene "Beenfreeheet" jüst vun een Fettnapf nor'n nächsten riekt, brukt Mutti sick kine Sorgen moken.

Worum ok kunn he nich dat moken, wat al Politiker fröher oder loter mokt: eenfach en furchtbor langwielig Book schrieven, dat denn as Blei in de Regole liggt un dat de Genossen to'n achtzigsten Parteijubiläum kriegt? Kieneen interessert dat un kieneen verdeent wat dor an. Ober nee, dat möt en Bestseller ween. Un denn noch een. Un denn noch sine Vorträge. Is jo got, dat he spannend schrieven un vertellen kunn. Ober möt he dat dorum ok glieks don?

Heel anners de Merkel. De kunn seeker ok watt. Irgendwatt. Se kunn ton Bispeel regeern. Un, lot se sick dat etwa anmarken?

Regeern kunnt de Sozis bloß mit eer,
wenn't ween möt eben ok mol ohne Peer.
Dat Rot-Grön ok mit de Linke tohop en Mehrheet het, wart bi de Sozis tapfer ignoreert. Nich dat op End noch een glövt, se warn links...

Wekeen hält anners noch to Merkel? Bloß so'n poor arabische Scheichs, de bi eer eere Panzer kopt un in USA de panzerbrekende Wapen, um de Panzer kaputttokregen un denn bi us neede to kopen, för de se denn wedder in de USA... Komisch, dat de arabischen Völker dat System nich mehr wullen, is doch jümmers god gohn. För us tomindest.

Arabische Diktatoren leeven Dütschland. Ick bün ton Bispel Kunde bi de HVB-Bank, dat heet, ick bün praktisch Kunde ween vun Gaddhafi. De Stoot Libyen is nämlich de twetgröttste Aktionär vun Unicredit, wo de HVB tohört. As ick dat rutkregen heb, wer ick so in Brass, ick heb fors min Bankkorte nomen un in't Gefreerfach don. Min Fro hett mi frogt "Wat mokst du dor?" Un ick hebb seggt "Konten einfrieren!"


Sekt un Kaviar — nich för Syrer! Dekadent ween möt se nu ganz vun alleen!

Poor Weken loter weer Gaddhafi dot. Dor kenn ick kien Pardon. Nu bi Syrien is de EU sogor noch härter: Dat Regime draf kiene Gucchi-Taschen un kien Kaviar mehr ut Europa kopen. Boah, wenn dat man nich gegen de Genfer Konvention is? Klor, den Kaviar kriegt se wieter ut Russland un de Taschen billiger ut China, ober wi hebbt wenigstens mol wat don un köönt wedder ruhig ümschalten, wenn in Fernsehen wat vun Krieg un Dode in de Region kummt.

Ersmol kummt de ägyptische Präsident Mursi up Stootsbesök nor Berlin. Veellicht kunn de jo ok jüs een poor neede Panzer bruken. Natürlich bloß, wenn he us versprekt, de nich gegen sin eegen Volk intosetten. Un dat verspreekt he wiss. Hooch un hillig. Sogor up de Bibel...

glövt

Joon Maat Jan



na baven