Minnerheiten

vun Wolfhard Sauerbrey


Wat snackt de Lüüd sik wat tosaam
vun "Minnerheiten" un so'n Kraam,
vun Saterfriesen, vun de Sorben,
vun Indios — fast ausgestorben,
vun niege Stämm in Neu-Guinea,
vun Sinti / Roma: Europäer,
de se in alle Welt verdriewt
un de denn blots dat Wannern bliewt.

Man, nu pass op: bet Wiehnacht is,
dor kannst du sehen, wahr un wiss,
dat se bi uns ok leven doot:
de Minnerheiten! De mit Not
un ünner Druck, mit letzte Kraft,
för uns denn so den "Wohlstand" schafft:

Den kennst du! Bringt, bi Snee un Regen,
poor Zentners Post as Wiehnachtssegen.
Du argerst di, kümmt he mol later,
un denn dat Tüüg vull Regenwater!
Den eenen Deel smiets du glieks weg —
dat ist blots Werbung un so'n Dreck.

Dat kriggst du, ok wenn du nich wullt:
Dat is sien Plicht — un nich sien Schuld!!

Na, schietegal! Dat warrt ja haalt —
du hest jo Müllabfuhr betahlt!

Un wat is mit de armen Hunnen,
de jeedeen Dag, för teihn, twölf Stunnen
mit'n Wagen dör de Stadt kareert
un di denn dienen Kraam bescheert?
För di — da is de Saak bequem!
För di — da is dat keen Problem!
Du liggst mit'n Handy in dien Bett,
bestellst den Schiet in't Internet,
denn wieder slapen — no time lost!
so geiht dat hüüt ja mit de Post:
De groten Händlers töwt op di,
se geevt dat in de Packerie,

un Stünnen later — dat geiht snell —
da is dat denn bi DHL,
bi DPD un UPS:
du markst nix vun, hest keeneen Stress!

Nu pingelt dat an diene Döör,
de junge Postler steiht dorvör,
un du dinkst blots: "De blöde Aap!
Worüm jetzt? In mien Middagsslaap!"

Un een poor Daag na düsse Flut —
so süht dat in dien Keller ut!

Dor liggt dat een un annern Dag,
dat wegtobringen is'n Plag,
eerst schuuvst dat jümmers du op "morgen" —
amenn muttst du dat doch entsorgen.

Nu kümmt de letzte Minnerheit,
de noch op miene Liste steiht,
wiel di ganz seker intresseert,
wat nu mit dienen Müll passeert?
Du kennst da noch so een Gebot:
"Herr, gib uns unser täglich Brot!"

Genau dat deist du gnädiglich
mit dienen Müllschiet, lediglich:
Worüm sik hier de Kinner quält,
hett woll den Namen "Brot" verfehlt!

Ach, Wiehnachtstied! Ach, Wiehnachtsmann!
För uns, da mööt de annern ran!
Dat sünd de lütten Minnerheiten,
de uns dat "Frohe Fest" bereiten ...

Weetst noch, wo still dat fröher weer?

De scheune Tied, de kümmt nich mehr!


Bild 9: Bundsarchiv 183-08705-0002

26.11.2019


na baven