Ja, öllere Lüüd, de kennt sik best mit de Koort ut!

Weeßt du, wat en "Navi" is?

vun Walter Meß


Klor weeßt du dat. Besünners weet dat de jüngeren Lüüd.

Dat is so en Navigationsgerät för dien Auto. Un all meent, ahndem kümmst du op de Straten hüüttodaags nich mehr torech. För de jüngeren Lüüd stimmt dat faken leider ok: Koorten köönt se nich mehr lesen!! Mit Kompass un Landkoort weet se nix mehr antofangen!! Se hebbt keen Bild vun baven mehr binn sik, keen "Vagelperspektive" vun de Gegend, woneem se sünd. Eentlich, denk ik mi, fohrt se denn ja "blind". Se seht twoors de Gegend üm sik rüm, avers se weet ehr nich mehr intoordnen. Wennehr is dat so wiet, dat een en Globus süht un fraagt: "Wat is dat?"!?


Wo bün ik? Ohn Navi...


...geiht dat eenfach nich wieder!

Se hebbt ja en Navi, un se folgt em op't Woort as so'n lütten Hund sien Herrchen. Ahn Befehle sünd se opsmeten. En fründlich junge Fru seggt di mit en Geisterstimm ut denn Zauberkasten nipp un nau, wo dat lang geiht. Dorför hett se Kuntakt mit Satelliten, de hooch baven över uns sweevt. De weet alltieds nau, woneem du büst. Nich to glöven, wo dat allens funktioneren deit.

Mien Söhn will mi nu jümmers so en Ding ansnacken. Ik will aver nich so recht. Op mien Insel Fehmarn un in Schleswig-Holsteen kenn ik mi goot ut, un achter Hamburg find ik allens mit' n Finger op de Landkoort.

Allerdings kemen mi vör Daag Twiefel. Wenn nu de plietsche Madam mit de Geisterstimm in denn Zauberkasten plattdüütsch snacken dee, ik glööv, denn överlegg ik mi dat doch noch.


Wenn so'n Navi Platt snacken wöör, harr he ok een!

Stell di dat mal vör, en "Navi" op Platt! Bi den Gedanken müss ik doch smustergrien.

Denn seggt de Madam:
"Noch 100 Meter, denn rechts afbögen. Nich vergeten, Foot vun't Gas!"

Un glieks achteran:
"Nu büst du vörbiföhrt, du Dööskopp — ümdreihn..., ümdreihn...! Man nich hier, is en Eenbahnstraat! Wat büst du doch för'n Traanfunzel!"

Un denn an Schluss:
"Nu steihst du vör de Döör. Kannst utstiegen. Rut mit di, man fix! Hest dien Plünnen noch nich tohoop?!"

Ik warr mal afluurn, un wenn dat denn mit den "plattdüütschen Navi" so wiet is, denn warr ik mi wohl doch so en Zauberkasten "op Platt" köpen.


Orr wi gaht komodig to Foot un leest de Koort!


Ha! Dat geiht natüürlich doch! To düsse Problematik schrifft uns Fred Würdemann:

Mien Navi snackt al platt mit mi un dat höört sik so an:
"Föhr in den Kreisel rin, de tweete Utfohrt"
or
"Hol di links"
or
"Nimm de Utfohrt, denn an End von de Straat links afbögen"
or
"Dreih mal üm, wenn't geiht
Or — jümmer wedder an'n schöönsten —:
"Du büst ankamen!"
Dat hett mi en PC-Freak opspeelt. Ik kenn mi mit sowat leider nich ut.

Also, wokeen sik rantruut: Googelt Se mal "navi selbst besprechen" orr sowat Ähnlichs! Un sünst: Leve PC-Freak, dat gifft wiss veel Kundschaft!


10.11.2013


na baven