Dat Leed vun de schöne Bescherung

vun Marlou Lessing

We wish you a Merry Christmas,
We wish you a Merry Christmas,
We wish you a Merry Christmas,
And a Happy New Year!

Wi wünscht di en frohe Wiehnacht,
Wi wünscht di en frohe Wiehnacht,
Wi wünscht di en frohe Wiehnacht
un en glücklich nieg Johr!

De Wiehnacht is dor, Bescherung mutt ween.
Wat kriegt wohl de mächtigen Minschen? Laat sehn!

Wi wünscht di en frohe Wiehnacht, ...

Bi uns in Berlin herrscht Merkel ehr Trupp.
De Fru is bekannt för ehr Kantüffelsupp.
To Wiehnacht kriggt Merkel för Supp enen Pott
un bald ok en Nafolger — wen? dat weet Gott!

Wi wünscht di en frohe Wiehnacht, ...

Meist jedereen weet: De Briten sünd mall.
"Get Christmas done!" roopt se in Bethlehems Stall
un wählt düssen Johnson. Dat iedele Swien
kriggt in sien Plumpudding nich Rum noch Rosin'n!

Wi wünscht di en frohe Wiehnacht, ...

In USA hangt se in'n Rookfang so'n Strump
för Santa sien Gaven. Dor binn stekt wi Trump.
En schöne Bescherung, se hebbt dat so wullt!
Trump schenkt wi den Strump as sien Dwangsjack — sülvst schuld.

Wi wünscht di en frohe Wiehnacht, ...

Treckt Stegner orr Esken den schöneren Flunsch?
De ol' SPD kriggt hüüt Duppelspitz-Punsch:
Dor schüddt wi veel Rum rin, egaal, 'keen se wählt,
denn hett doch de Punsch de Perzenten, de fehlt!

Wi wünscht di en frohe Wiehnacht, ...

De AfD wünscht sik en Märtyrer-Dood:
Wenn Utlänners Düütsche killt, dat deit ehr good!
Se leevt vun de Minschen ehr Bangnis, as Geier.
Wi schenkt ehr to Wiehnacht en Kick in de Eier!

Wi wünscht di en frohe Wiehnacht, ...

De Polen sünd füüsch op Klima un so;
de Polen leevt Kohlen, bloots de maakt ehr froh.
Australien liekso; man kiekt dor mol hen!
Wi wünscht ehr to Niejohr nie mehr solke Bränn'.

Wi wünscht di en frohe Wiehnacht, ...

Opletzt von der Leyen: Ehr Daten sünd weg!
Dat Geld ok! Wat nu? — Na dat kehrt ehr en Dreck:
Is nu staats Ministersch Europa ehr Braut!
Wi schenkt ehr för Daten en Platz in de Cloud!

Wi wünscht di en frohe Wiehnacht,
Wi wünscht di en frohe Wiehnacht,
Wi wünscht di en frohe Wiehnacht
un en glücklich nieg Johr!