Arbeiters, wo blifft juun Opschrieg?

In de globale Weerschap is pure Anarchie togang. De Gier terfritt de Mächtigen ehrn Bregen. En Wootanfall vun Heiner Geißler


(c) "Die Zeit" vun'n 11.11.2004 Nr.47
Plattdüütsch vun Marlou Lessing

»Das Kapital hat die Bevölkerung agglomeriert, die Produktionsmittel zentralisiert und das Eigentum in wenigen Händen konzentriert. Die Arbeiter, die sich stückweise verkaufen müssen, sind eine Ware wie jeder andere Handelsartikel und daher gleichmäßig allen Wechselfällen der Konkurrenz, allen Schwankungen des Marktes ausgesetzt.« Karl Marx/Friedrich Engels, 1848, »Manifest der Kommunistischen Partei«

146 Johr later töövt in Düütschland — as weer de Klassenkampf nienich ziviliseert woorn — Teihndusende vun Arbeiters op den neegsten Slag ut de Konzernetagen vun General Motors, Aventis, Volkswagen un Continental, de ehr in de Arbeitslosigkeit un achterna — mit de Hülp vun'e Politik — na ganz nerrn op'e soschaale Ledder hendalbringt.

Nich dat Gespenst vun'n Kommunismus, nee, de Angst geiht üm in Europa — tosamen mit Woot, Afscheu un deepes Misstruun gegen de politischen, weerschaplichen un wetenschaplichen Eliten, de, liekso as de Verantwoortlichen dunntomalen bi'n Övergang vun'n Feudalismus in de Industriesellschap, dat apensichtlich nich tostann kriggt, de Globaliseern vun'e Ökonomie, de sik nu mal nich vermeiden lett, humaan to maken. Nee, se priest lever en anarchische Weerschapsordnung an, de över Lieken geiht — un beropt sik dorbi op de angeevlichen "Gesetten vun'n Markt".

100 Millionen vun Arbeitslosigkeit bedrauhte Minschen in Europa un de USA un 3 Milliarden Arme, de tosamen weniger Inkamen hebbt as de 400 rieksten Familien op de Eer (!), klaagt an:
Se klaagt de Vertreders vun de Shareholder-Value-Ökonomie an, de keen annere Werten kennt as Angebott un Nafraag, de Spekulanten toarbeidt un langfristige, nachhaltige un vernünftige Investoren toweddern staht.
Se klaagt an: de Staatsmänner vun'e westliche Welt, de sik vun de multinaschonaalen Konzerne erpressen un gegenanner opbringen laat.
Se klaagt an: en Kartell vun Ökonomieprofessoorn un Publizisten, de meent, de minschliche Sellschap müss funscheneern as DaimlerChrysler, un de taagnackig nich sehn wüllt, dat de Markt en minschliche Ordnung brukt, dat dat ok globaal Regeln gifft, an de de Markt sik hollen mutt, un dat Lohndumping de gode Arbeit un de goden Produkte toschann maken deit.

De Arbeiters in de Industriestaaten un ehr Gewerkschapen, de bi düsse Massenarbeitslosigkeit mit'n Rügg an'e Wand staht, föhlt sik, as harr en anonyme Macht över ehr dat Seggen, de vun Minschen utöövt warrt, de ehr Gier na Geld ehrn Bregen terfritt. De Minschen leevt un wuracht in en globaliseerte Weerschap, de en Welt vun Anarchie is — sünner Regeln, sünner Gesetten, sünner soschaale Övereenkamen; en Welt, in de Ünnernehmen, Grootbanken un de ganze »private Sektor« ahn Regeln togang ween köönt. De globaliseerte Weerschapswelt is ok en Welt, in de Verbrekers un Drogendealer frie un ahn Tribelaschoon to Wark gahn köönt, en Welt, in de ok Terroristen Deel hebbt an en gigantische Finanzindustrie un dormit ehr mörderischen Anslääg finanzeert.

Woneem blifft de Opschrieg vun'e SPD, de CDU, de Karken gegen en Weerschapssystem, 'neem grote Konzerne sunde lütte Firmen as "Kadus" in'n Süüdswattwoold mit Mann un Muus opköfft, as weern dat Slaavenscheep ut't 18. Jahrhunnert — un se denn eenfach dichtmaakt, üm ehrn "Markt to bereinigen" orr ehr egen Kapitalrendite un ehrn Börsenwert to steigern?! Dormit is de weerschapliche Existenz vun Dusende Familien in'n Süüdswattwoold toschann maakt. Düsse sittenlose un ok weerschaplich idiotische Kapitalismus wiest de Minschen sin wööste Fratze, wenn de Börsenweert un de Managergehälter – koppelt an'n Aktienkurs – höger un höger stiggt, je mehr Minschen wegraschonaliseert woorn. De gerechte, avers ahnmächtige Woot vun'e Lohnarbeiters warrt dull gegen dat schaamlose Geldinsteken vun Managers, de ehr »Verdeenst« (dat schrifft sogoor de FAZ) dat is, dat se Milliarden Euro vernicht un Dusende Arbeitsplätze terstört hebbt.

Dat Triumphgeheul vun'n Bundesverband vun'e Deutsche Industrie över de Billiglohnkonkurrenz ut Oosten hebbt wi noch in de Ohren, un al wedder mööt sik Minschen, de an'n Rand drängt warrt, vun dat politische un weerschapliche Establishment as Neonazis un Kommunisten schanderen laten, wenn se radikale Parteien wählt, wieldat dat keen echte Opposischoon mehr gifft, bloots en Grote Koalischoon, de uns Republik mit en Metzgerladen verwesselt, 'neem so deep in't soschaale Fleesch sneden warrt, dat dat Bloot man blots so sprütt — staats endlich dör Börgerversekerung un över Stüern finanzeerte Soschaalkassen de Löhne vun de Lohnnevenkosten to befrien. Blots Döösköpp un Beterweters sünd dat, de de Lü wiesmaken wüllt, dat Solidarität un Partnerschap in en Sellschap anduernd toschann maakt warrn köönt, ahn dat dat jichenswenn en politischen Pries kosten deit. Woso warrt dat doodswegen as en Tabu, dat dat en gode Alternative to dat jetzige Weerschapssystem gifft: en internaschonaale sozial-ökologische Marktweerschap mit en ordneten Wettbewerb?

Ideen verännert de Welt.

Ok in en globale Weerschap sünd Produkschoon un Service ahn Minschen nich mööglich. Niege Produkschoonsfaktoren so as Kreativität, Plie un Weten sünd tokamen. Avers de Spannung twüschen Minsch un Kapitaal is bestahn bleven. De Kommunisten harrn den Konflikt lösen wullt, indem dat se dat Kapitaal wegmaken dään un de Kapitaal-Besitters glieks mit. Dat is bekanntlich scheep gahn. Vundaag geiht't annersrüm: Vundaag maakt dat Kapitaal de Arbeit weg. Un de Arbeiters glieks mit. De Kapitalismus is jüst so op den verkehrten Padd as dormalen de Kommunismus.

De Danz üm't güllen Kalv is al mal in'e Büx gahn.



na baven