Ik wull (k)een Prinzessin sien

vun Silke Frakstein


As lütt Deern klor. So as hüüt ok. Mit'n Bodderlicker in't Hoor, swatte Lackschoh un ganz wichtig: De Rock ut Tüll. Un denn danzt se üm de Wett un trällert dorbi. Allens licht un scheun, eenfach wunnerbor.

Mit Glück is'n Broder orrer sünst een ut'n Kinnergoorn dorbi un de is denn de Prinz un mutt allens moken, wat de Prinzessin so will. Klappt dat nich (kümmt ok vör), gifft dat wat mit'n Zepter an'n Dassel.

Un de richtige Prinzessin? In Japan is de eenfach achter de Port verswunnen un hett dat bannig mit de Nerven.

In Spanien hett de Deern dat verkehrte Mannsbild heirot un is nu ut de Spoor.
Bi de Kaaskopjes schient dat wohl to klappen.
Ober in Monte Carlo weer ik geern mol so'n lütte Muus. De een Prinzessin gegen de annere...

Woher ik dat allens weet? Bi'n Putzbüdel geiht mi dat jümmers god un denn heff ik ok de Nerven un kunn dat Gröne Blatt orrer de Bunte lesen.
Ne, wat gräsig! Allens, ober würklich allens warrt bekakelt. "Dat Kleed is to kott, de Farv passt nich un den Hoot harr se all mol op, usw., usw., usw..." Keen Wunner, dat de all dünn un klapperig sünd.

Un dat is jo nich erst hüüt so. Uns "Sissi" hett sik kasteit op Düwel kumm rut.
Un wat is mit "Diana"? Die Mode-Ikone is 20 Johr nich mehr op de Welt. En Deel vun ehre Kleeder sünd in den Kensington-Palast utstellt. De Kleeder weern de Protest, denn veel to seggen harr se nich. Un dat Volk hett ehr anhimmelt un de Froons hebbt sik glieks an de Neihmoschien sett un allens kopeert.

Wat'n Glück, dat ik keen Prinzessin mehr bün. De Kinnertiet is lang vörbi. Un mien
Designerhöschen an'n freuhen Morgen is kuschelig un nix klemmt.

Un doch warr ik düt Johr no Gotha fohren un to mienen Geburtsdag in dat Slott de grote Gala mitmoken. Denn köönt all de Lüüd sik de Kleeder ut den Fundus rutsööken un as Kaiser, König orrer Prinzessin gohn.


19.3.2017


na baven