Dor warrst du oolt as'n Koh un lehrst jümmers noch dorto:
En Döör is to, wenn dat dor ansteiht, liekers se open is

vun Ursula Vollstedt


Dr. Reimer Bull, de plattdüütsche Geschichtenverteller, weer verleden Week in'n Kiekkassen bi'n NDR op dat "rode Sofa". He hett wat seggt, dat fallt mi bi't Schrieven jümmers wedder in. He sä: "Wat du sülven beleevt hest, dat kannst veel beter vertell'n."

Ik heff jüst sülven een Geschicht beleevt, de mutt ik glieks opschrieven.
Kennt ji de Goorns vun de Hobbygoorners an de Krückau? Heel scheun süht dat dor ut. In Sommer vun Mai bet 30. September is de Poort den Dag över los, un du kannst op den Stieg vör düsse Goorns langspazeren un di an de scheunen Blomen freu'n.

De 30. September is vörbi, ober as ik mit mien Fründin üm den Rantzauer See lopen bün, dor weer de Poort nich afsloten. Wi beiden sünd dor rinlopen, hebbt de scheunen Goorns bekeken un uns an de velen Blomen freit. As wi nu an de Poort ankemen, de bi'n Kösterkamp is, harrn wi Malör, de Döör weer to. "Is nich slimm, denn kehrt wi eben wedder üm un goht dor wedder rut, wo wi rinkomen sünd." Intwüschen harr ober een vun de Goorners Fierovend mookt. He harr, jüst so as dat wesen schall, de Poort nu afsloten.

Dor stünnen wi nu, insparrt twüschen Planten un Blomen. Keen Minsch weer to sehn. All de Goorns harr'n een Vörhangslott an de Poort. All de Goorners weern to Meddag no Huus föhrt.

'n Handy hebbt wi all beid, natürlich to Huus op't Schapp. Un nu? Mött wi nu dörch de Krückau lopen? Mött wi över de Au üm Hölp ropen? Irgendwie mött wi hier rut, egol wie.

Ik bün de ganze Reeg Porten lang lopen un heff överall keken, ob nich een Lock los weer. Un endlich harr ik Glück. Ik kunn jüst noch den Kopp vun en Fru sehn, de in en Goornhuus seet. All mien Fründlichkeit heff ik utspeelt, as ik ehr frogt heff, ob se uns wull retten kunn. Wi hebbt uns ordig bedankt un hebbt de fründliche Fru versproken, wi wüllt ehr in uns Nachtgebet insluten, wiel se uns rett harr.

Wat lehrt wi ut düsse Geschicht? Wenn an en Döör ansteiht, dat se vun'n 1.Oktober jümmers afsloten is, denn glööv dat eenfach, ok wenn se open is. Ans weer ja keen Ordnung mehr!

Kannst sehn, du warrst oolt as'n Koh, un lehrst jümmers noch dorto.


Fotos: Ursula Vollstedt
25.10.2009


na baven