Stellnanbotten!

Arbeitslos? Mutt nich ween! De US-Regeern hett de Inischatiev övernahmen un schafft Jobs för junge Lüüd in de ganze Welt. Groottöögsch wüllt se ok de Europäers doran Deel nehmen laten. Denn man ran an de Job-Anbotten!


1. De USA beed an: Arbeit as
Gefahrstofftransportöör

De US-Regeern söökt dynaamsche junge Lüüd, de poor Fohren Massenvernichtungswaffen na de iraaksche Provinz karrn un dor verbuddeln köönt.

Vörutsetten: LKW-Föhrerschien. Süss sünd keen besünnere Fertigkeiten för nödig, bloots bi Nacht mit en Stratenkoort un Kompass klarkamen schullt Se könen. Se mööt achterna nau angeven, woneem Se't verbuddelt hebbt, dat wi dat ok foorts wedder utbuddeln köönt. Dorför is dat nämli dor. Un dat Se dat nich ut Versehn in Kuwait aflaadt! Dor dröff sowat nich funnen warrn. (Wenn Se sik na Iran verirrt, is dat nich so leeg. De hebbt wi ok op'n Kieker.)

Opstiegsmööglichkeiten: Karriere in de CIA mööglich — as Spezialist för Massenvernichtungswaffen. Dat's'n Job mit Tokumft!

Mailt Se Ehr Bewerbung mit Angaav vun Ehr Gehaltsvörstellung an fohr-mi-mal-röver@cia.gov.


2. De USA beed an: Arbeit as
Moors-Henholler

De US-Regeern söökt dynaamsche junge Lüüd, de nich veel öller warrn wüllt. Se schullt den Bockmist, den de USA in'n Irak anricht't hebbt, wedder opklaarn un sik staats de US-Boys doodscheten laten. Se schullt also nu den Moors henhollen för en Krieg, gegen den ganz Europa tovör demonstreert hett.

Vörutsetten: Besünnere Dösigkeit, ringen Verstand. NATO-Suldaten warrt geern nahmen. Se schulln mall noog ween, överall dor hentogahn, 'neem wi us vunwegen de Levensgefohr nich mehr hentruut. Babento schulln Se in de Laag ween, Water- un Stroominstallaschoonen to repareern. Dorför sünd wi nämli to dösig.

Opstiegsmööglichkeiten: Dat's'n Job mit Tokumft! Wenn dat klappt, solk Döösbaddels to finnen, de unsen Schiet in'n Irak opklaart, denn plaant wi, in de ganze Welt mehr vun so'n Bockmist to maken. Dor warrt dat jümmers wat för so'n Moors-Henholler to doon geven — wenn Se dat överleevt....

Mailt Se Ehr Bewerbung an laat-mi-an-land@cia.gov. Gehaltsvörstellungen bruukt Se nich angeven, dat betahlt nämli SeEhr egen dösiges Land för us. Hööpt wi tominnst. Wi sünd nämli bald ok pleite.

Wi tellt op Se!
De Bush-Administraschoon


Marlou Lessing


na baven