Stüerlast

vun Heinz Tiekötter


Martin Gloer is Mokler un hett sik op Gastronomie spezialisiert. He verdeent düchtig, denn wenn he di 'ne Kneipe vermittelt, kriegst du bi em ok glieks de Speel- un Zigarettenautomoten. In uns Hauptstroot hett Nico sien greekschet Restaurant. Düsse Goldgrube hett Martin em vermiddelt un Nico is em dankbor. Se sünd meist sowat as Frünnen. Hett Martin in de Gegend to doon, kiekt he jümmers bi Nico op 'n Drink rin. Annerlest vertell Nico em, dat he för sien Familje un sik geern 'n Huus keupen würr. Em sweevt so üm de 200 Quadrootmeter Wohnflach vör. So üm 500.000,- Euro wull he anleggen. Martin froog em no sien Egengeld. Dat leeg bi 300.000,- un Nico wull den Rest finanzieren. Wat Martin em ok en Hypotheek besorgen kunn, much he weten. Kloor, dat kunn he, anter Martin. "Denn bruuk ik ok dien to verstüerndet Inkomen."

Dat liggt bi 14.000 Euro, anter Nico. Martin rekent kott: Mol twölf Moond, sünd dat 168.0000 in Johr; dat langt, denn gifft de Bank di ok Geld för 'ne Hypothek. "Wiso kümmst du op 168.000?", froogt Nico. "Mien Inkomen is 14.000. In Johr!"
Martin lacht luud op: "Denn gifft di kene Bank op düsse Welt 'ne Hypothek", seggt Martin. Nico hoolt een Rull Hunderter ut siene Büxentasch mit 'n Gummiband dorüm. De Rull weer meist so dick as 'ne halbe Klorull.

Martin verkloor sienen Fründ Nico nu wat öber den Afloop vun en Grundstücksgeschäft: "De Bank gifft di bloots Geld, wenn du Sekerheiten hest un en godet Inkomen. Wenn du dien Huus funnen hest, geihst du mit den Verkeuper to'n Notar. De sett en Verdrag op, un wenn ji beiden ünnerschreben hebbt, schickt he dorvun 'ne Utgoov an dat Finanzamt. De sall jo de Grunderwarfsstüern fastleggen. Wat gläuvst du woll, wat de Finanzbeamte seggt, wenn he sütt, dat du 300.000 Euro Egengeld hest un för de Hypothek vun 200.000,- elkeen Moond 'n runnen Dusender afdrücken kann. Un dat bi bloots 14.000 Euro in Johr. Man, Nico, dat duert keen Woch, denn steiht de Stüerfohndung bi di in'n Loden!"

Nico kiekt sien Fründ Martin deep in de Ogen, schüttkoppt un seggt: "Nu verstoh ik ok, dat de Düütschen nienich Geld hebbt. Se sünd to dösig. Ik mook hier noch 'n beten wieder un denn keup ik mi 'n Huus in Greekenland.
Stüern sünd bloots för Dösige", seggt Nico, denn he is'n Greek.



30.8.2018


na baven