Vöroordelen vun Meike Balzer-Fraun Kommodig sitt ik in'e Stuuv bi de Narichten. Sommer 2022. Aver batz sitt ik wedder in den Fleger vun Atlanta torüch na Frankfurt. 2014. De Narichten, de mi op düsse Reis torüch schickt hefft,
weren de Biller vun'n Flooghaven München, wo Lüüd in
Dirndlkleder un Ledderbüxen de Politikers op ehren Weg na Elmau
begröten. 2014 bün ik jüst Rentnersche worrn un heff mien Fründin in Decatur in de USA besöcht. Nu flügg ik trüch. Mal wedder veerteihn Daag Alldaagsleven in Amerika liggt nu achter mi. Blangen mi sitt en junge Deern. Middewiel hett se sik mit ehr Nackenkissen,
de Deck un all de Elektronikkavels torechtschüddelt. Blots in München sünd se för twee Nachten in datsülbige
Hotel, wieldat se noch en Utfloog na Salzburg maken wüllt
dor schall wat mit Musik wesen. Se fraagt nu allerhand, wi snackt, de Nacht vergeiht "in'n Floog".
Wat se mi woll glöövt, dat dat faken Geld kost, wenn een
in Düütschland op de Toilett gahn mutt, dat een för
Water in't Lokal betahlen mutt, dat dat keen free refills' un
to'n Fröhstück woll keen peanutbutter' gifft? Ik weet
dat nich. Villicht slöppt se ja in solk Hotels, as wi dat in Frankfurt/Maintal
mal beleevt hefft: De nahkamen Daag heff ik noch faken an de Deern op ehr Europareis
dacht. Wat se woll för Erinnern mit na Huus nahmen hett? Mien
eerste Reis na Amerika: 1992. 14 Daag, een Week an de Uni vun Athens,
een Week in en Gastfamilje in Decatur bi Atlanta. Studienreis för
Engelschlehrers ut Neddersassen. Mien Gastmoder is mien Fründin worrn. Teihn Mal in 30 Johren
hefft wi un uns Familjen uns besöcht, mal hier, mal dor. As ik to'n Bispiel mal in'n Oktobermaand in Decatur weer, hett mi jüms fraagt, woso ik nich to Huus weer, dor weer doch Oktoberfest. Un glieks harrn wi wat to snacken. Torüch na de Narichten: Ik bün ok geern mal in Bayern, man dat is ja nu würklich
nich allens vun Düütschland nich. Wi hefft de groten Städer,
dat platte Land un wat noch allens. Wi dröfft uns doch nich verwunnern, wat för Biller en Deern ut Californien in'n Kopp hett, wenn wi jümmers wedder desülvigen Biller in de Welt schickt. Dormit bedeent wi doch de Vöroordelen. 10.7.2022
|