Ganz schön veel Wind

vun Karl-H.Nissen


Dat is al recht en poor Johr her, dor is en goden Fründ mit mi na Gedser föhrt. He harr mit den elektrischen Strom to doon un de Dänen harrn sik wat utdacht, woans man den ut Wind gewinnen kunn. Dat weer heel interessant för mi un dat geev veel to kieken. Mien Fründ hett mi allens verkloort, ik heff ok wat begrepen.
Dulle Idee: Strom ut Wind!

En Tiet later harr Klaas — he leevt up en Insel — so en Windmöhl vör sien Döör stahn. De Möhl maak Larm, bi Sünnenschien huschen alle Oogenblick de Schadden vun den Propeller vörbi, man Klaas weer heel tofreden. He harr Strom för sien Huus un kunn den Rest verköpen, de Strom güng vun sien Möhl in en dick Kabel rin.

Hüüt gifft dat vele vun disse Windmöhlen, se sünd veel grötter, oft höger as uns Marienkirch in Lübeck. Se staht överall in uns Land un ok in de See un se levert so veel Strom, dat se uns ganz Land versorgen kunnen. Köönt se avers nich. De dicken Kabel fehlt. De loopt jümmers över anner Lüüd ehr Land — un dat geiht doch nich eenfach so.

Dit Windmöhlengeschäft is en groot Geschäft. Vele Johren weer de hübsche Stadt Husum de Platz, wo de Musik dorto speel. Dat is nu anners. Nu hett Hamborg de Nääs vörn.

"Ik weet nich", seggt Korl, " wo kann dat sien, dat leep doch goot in Husum?"

"Ja — aver Husum is man lütt un Hamborg is en Weltstadt. De mütt wat vörwiesen. Un dor passt so en Wind-Messe goot dorto."

"Mag so sien, man wat mi wunnert, de Saak is so ganz still un liesen över de Bühn gahn. Keen Striet, keen Gerangel. Ok vun uns Böversten weer meist nix to höörn."

"Korl, dat is doch goot so. Wenn dat üm dat grote Geschäft mit den Wind geiht, denn maakt man beter nich so veel Wind."


Fotos: ML
16.6.2013


na baven