De Woterputz

vun Heinz Tiekötter


Warst du ok jümmers needsch, wenn du 'ne Polizei-Barkass bi Sünnenschien achterrankiekst? Dinkst du ok, dat so'n Udl 'n Droomjob hett? Op de Alster un de Bill mach dat wull öberwiegend so sien; man nich in'n Hamborger Hoben, wo de Blauen alle Hannen vull to doon hebbt. Dor mööt se Oilplacken, Rammings, Drogensmuggel, Container-Opbrüche un noch veel mehr klarieren.


Sünnschien un Water — Polizei-Idyll?

Bit anfangs de Achziger Johr kemen dat Personool vun de Woterschutz meist ut de Seefohrt. Dorüm weern de mehrstens so fair, as man Hein Seemann dat noseggt. Denn hett sik dat ännert: De Tietsuldoten vun de Bundsmarine kemen un wull'n nu in'n Stootsdeenst öbernohmen warden. Un slagordig hett sik de Ton an de Küst ännert. Hett vörheer de Blaue die eerstmol 'n goden Dag wünscht, bevör he di seggt hett, du sallst di man mehr no de Stüerborssiet holln, büst du nu mit'n Kasernenhoff-Ton anbblubbert worrn un de Udl wull dien Papiern sehn.


De de Drogen jaagt, dröfft falsch parken!

Man du kunnst jem ok kregen: Mien Fründ Heiner weer Drogenfohnder bi'n Toll. Se harr'n Tipp kregen un wulln 'n Damper dörchseuken. Den Zivilwogen stelln se an de Schuppen-Infohrt af. As se vun Bord trüchkemen, hung en Ticket ünnern Schiebenwischer. De Wogen vun de Woterschutz stunn 'n lütt Stück wieder. Mit den Beamten weer nich to schnacken. He krakeel, as harr he en Rekruten un nich en Toll-Hauptsekretär vör sik. Platt schnacken kunn he ok nich. Dorüm harr dat ok keen Folgen, dat Heiner meen: "Denn foot mi an de Feut!" Dat kunn de Mann nich för sik öbersetten.

Heiner nehm dat Ticket un mell sik annern Dag bi den Revierführer an Ellerholzdamm an. De Revierchef meen, de Beamte harr jo bloots siene Plicht doon. Heiner hett em angrient un em versproken, dat he un sien Kollegen dat tokünftig ok moken wüllt un dat se tokünftig jeden Woterpolizisten kontrollieren ward, wenn se mit Daschen vull Kööm un Zigaretten vun Boord koomt.

De Revierchef weer noch een vun de ole Sorte un keem ok ut de Seefohrt. He hett Heiner angrient un froogt, wat de em den Zettel nich schenken wull. Achteran hett he de Schuuv optrocken, twee Glöös ruuthoolt un 'n Lütten inschenkt. Beide hebbt mittenanner anstött un denn mit 'n Grientje faststellt, dat se sik grod tosomen de Hehleree schullig mookt harrn.


21.3.2019


na baven