Adobe Reader bruken

Normaalerwies start Se den Adobe Reader nich lerrig, man mit en Datei.

Dat kennt Se ja: Wenn Se en Datei duppelklickt, denn geiht se op — un tosamen mit ehr dat Programm, dat to de Datei 'höört. Duppelklickt Se t.B. en Word-Datei, dennso ward automaatsch dat Word-Programm apen maakt un denn dar binnen ok de Datei opmaakt. Duppelklickt Se en Musikdatei, denn geiht automaatsch de Windows Media Player orrer'n anneres Musikprogramm los. Jüst so is dat mit de Adobe Reader. — Wieldat de Reader bloots to'n Ankieken vun Datein dar is, nich to'n Erstellen, is he alleen to nix good.

Wenn Se nu al en pdf-Datei op SeEhrn Computer liggen hebbt, dennso köönt Se ehr nu eenfach duppelklicken, denn ward dat tosamen mit de Adobe Reader apen maakt. Denn seht Se dat Programmfenster vun'n Adobe Reader, un de Name "Adobe Reader" steiht ok in de Titelliest. Düt Bild wiest Se dat Adobe-Programmfenster.


Bild: Dat Programmfenster vun'n Adobe Reader, wenn Se t.B. 'n pdf-Dokment vun'e Fastplatt duppelklickt hebbt.

Datein ut'n Internet

Interessanter ward dat, wenn Se'n pdf-Datei ut'n Internet rünnerlaad. Laad Se sik t.B. en Datei vun düsse Websiet rünner. Dat's'n pdf-Datei. Woans geiht dat nu vör sik?

1. Bi den Download lopt de Daten op SeEhrn PC.

2. Sodraad alle Daten dar sünd, geiht in SeEhrn Browser de Adobe Reader mit dat Dokment op. Dar köönt Se dat ankieken. Vun'n Adobe Reader seht Se avers bloots de Symbolliest direkt över dat Dokment! Dat Fenster, de Menüliest usw. 'höört jümmer noch to SeEhrn Browser. Dat süht ut as op dat Bild nerrn. — Düsse Technik, dat een Programm in en anner Programm inbuut ward, ward Plug-in nöömt (Plattdüütsch: Inproppen).

3. Wenn Se nu dat Fenster eenfach wedder tomaakt, denn ward de Datei ok tomaakt — ahn dat se op SeEhr Fastplatt sekert worrn is! De is denn weg, un de hele Download weer för de Katt.

Dorüm is dat Wichtigste bi pdf-Datein ut'n Internet: Vergeet Se dat Spiekern nich!


Bild: De Adobe-Reader, inleggt in dat Fenster vun'n Browser. Bloots de Symbolliest un dat Dokment is vun'n Adobe Reader to sehn.

 

Un woans spiekert een wat in'n Adobe Reader?

Ganz eenfach: Klickt Se op den Knoop Kopie speichern op de Adobe Reader-Symbolliest.

Se kaamt in den Dialoog Kopie speichern unter..., söökt sik hier en Ordner op Ehr Fastplatt ut un klickt denn op Speichern. Dormit is de Datei warm un seker afleggt!


Bi't Spiekern vun en Datei

Süh, nu sünd wi bi de wichtigsten Funkschoonen vun'n Reader ankamen.

Funkschoonen vun'n Adobe Reader

Dat Dokment, dat Se rünnerladen hebbt, ward in't Programmfenster vun'n Adobe Reader apenmaakt. Dat fangt natüürlich boven an; dat heet, Se seht de eerste Siet.
Woneem is de Muuswieser? De is to en lüttje Griephand worrn. Dormit köönt Se bi daaldrückte linke Muustast dat Dokment na links, rechts, boven oder nerrn trecken — Se köönt also blädern. — Wenn Se dorbi nau henkiekt, seht Se, woans sik bi't Topacken (Daaldrücken vun'e Muustast) de lüttjen Finger an'e Hand tosamenkrampt. Putzig, nich?

Dat Blädern in't Dokment geiht natüürlich noch lichter, wenn Se dat so maakt, as Se dat wennt sünd: Mit'n Rullbalken rechts oder mit de Pieltasten vun'e Tastatur un ok mit dat lütte Rad an SeEhr Muus, wenn Se so en Muus mit'n Rad hebbt.

Grött vun'e Afbillung

Se köönt sik utsöken, wa groot Se dat Dokment op den Billschirm sehn wüllt. (Mit de Grött vun de Bookstaven bi't Drucken hett dat natüürli nix to doon, de steiht fast.)

Dorto gaht Se op dat Feld Zoom. Wenn Se op den lütten Piel blangen dat Feld klickt, klappt en Liste ut, 'neem Se per Klick en Vergrötterung utwählen köönt.

Mit dat Zoom-Listenfeld
köönt Se de Grött prozentuaal instelln

Man staats de Liste to bruken, köönt Se ok den Vergrötterungsfaktor direkt in dat Feld intippen.


Mit de twee Knööp linkerhand un rechterhand vun't Zoom-Feld köönt Se dat Dokment ok stopenwies vergröttern (Plus-Koop) orr lütter maken (Minus-Knoop).


Noch wieder linkerhand finnt Se twee Knööp, mit de Se dat Grött vun de Datstellung an de Grött vun't Programmfenster anpassen köönt — so, dat de Breed orr de Hööcht vun en Dokment-Siet jüst in't Fenster passt.



Good to bruken is ok dat Lupen-Warktüüch linkerhand vun düsse Knööp.

Acht Se op den lütten swatten Piel blangen de Lupe. Dor is en Liste achter, de een utklappen kann; dormit kannst bi de Lupe instelln, wat se nau maken schall.

Wenn Se hier Dynamischer Zoom wählen doot, denn köönt Se achterna dör Trecken (mit daldrückte Muustast) op dat Dokment den Zoom verännern. Trecken na baven vergröttert, Trecken na nerrn maakt dat lütter. Liekso funscheneert nu dat Rad an de Muus! Blädern geiht nich mehr, dat dreiht man bloots an'n Zoom.

Tipp: Lupe "wegleggen"

Wenn Se de Lupe bruukt hebbt, is de Muuswieser en Lupensymbool. Wenn Se nu achterna geern wedder dat Hand-Symbool harrn, klickt Se man eenfach de Hand op de Symboolliest an!

Dreihn

Se köönt dat Dokment ok dreihn, untwoors mit düt Icon hier. Wenn Se den Piel dorblangen drückt, köönt Se den Dreihsinn ok ännern!



Tipp: Icons nicht dor?!

Wenn bi Se jichenseen vun de Symbooln fehlen deit, denn rechtsklickt Se eenfach jichenswo in de Adobe Reader-Symbolliest un wählt ut dat Kontextmenü de fehlen Liest an! Liesten, de to sehn sünd, hebbt en Hoken.

Dat Kontextmenü in de Symboolliest:
Enkelte Liesten (un dormit ehr Symbooln)
kannst ok utblenden

 

 

 

Hier geiht't wieder in'n Text!