De Kantüffel sünd rut. De Kürbis, dat Korn is in de Schüün. Allens is in dit Johr, so meen ik, goot rinkamen.

Nu is Oorndank. Wokeen hüüt morgen to'n Gottesdeenst geiht, de süht up den Altar Blomen un Appeln un den Oornkranz ut Korn bunnen. Ik heff in Slutup ok al mal Fisch up'n Altar sehn.

Ok in uns Kapell in Lütten Grönau liggt up'n Altar Brot un anners wat. Hüüt is dor de letzt plattdüütsch Andacht för dit Johr. Nahstens warrt dat to kolt. Dat weer en schöne Tiet vun Pingsten an. Dat geev feine Musik, wi hebbt sammelt för de Krankenhuus-Clowns, un wi hebbt gode Wöör höört, un dat meist up Plattdüütsch — dat is Lütten Grönau.

De Kapell weer jümmers goot besett. Dat is en richtige lütte Gemeen, meist kennt een den annern, gifft jümmers wat to snacken achteran bi en Tass Kaffee in'n Kroog up de anner Stratensiet. Hüüt, an'n Oorndank eet wi noch beten Smoltbrot tohoop, man denn is dat för dit Johr to End.

"Na", seggt Korl, "denn freu di up dat tokamen Johr, wenn dat geiht wieder." He keek mi an. "Wat treckst Du för'n Snuut?"

"Tja, Korl, ik maak mi so'n beten Sorgen. Uns Lütt Kapell is jümmers goot besöcht. Meist sünd dat de ölleren Johrgäng, de dor sitt. Dat Middelöller fehlt en beten, vun de Jungen will ik gor nich snacken.
Un so is dat ok bi de, de de Andacht hollen doot. Dat sünd Pasters, man de mehrsten sünd in'n Ruhstand. Dat sünd graad noch twee Aktive. Laien hebbt ok Andachten hollen. En half Dutz weern wi mal. Nu is dat man noch een. Fruun harrn wi dit Johr gor nich dorbi! Schaad! Dorbi is doch Plattdüütsch in uns Kapell — Plattdüütsch in uns Kirch — wat heel Wunnerbores!"

"Sett di man nix to Kopp", sä Korl, "nu kümmt Tiet to'n Nadenken, un pass up, Pingsten 2015 geiht dat weder los, so as vele Johr."

"Na, wenn du dat seggst, ik will't geern glöven."