Adventus Domini — dei Herr kümmt

vun Behrend Böckmann

Advent, dat is dei Tiet vör dei Hillig Nacht un wür in't föfte Johrhunnert taun iersten Mål an vier bet söss Sünndåch üm Ravenna in Italjen fiert. In't sösst Johrhunnert hett denn Papst Gregor dei Grote fastlecht, woans dei Advent an vier Sünndåch tau fiern is. Vier Sünndåch sallen up dei 4000 Johr hendüden, dei dei Minschheit up den Erlöser täuwt hett. Papst Pius dei Föffte (1504-1572), hei wier af 1566 in't Amt, hett denn dei Adventsliturgie fastlecht un dei Adventstiet tau'n Fastentiet måkt.

Un Advent wür inne kathoolschen un nåhst inne reformierten Karken fiert, bet dei Lutheraner Johann Hinrich Wichern (1808-1881) in't Johr 1839 den Adventskranz erfinnt. As Theologe un Sozialpädagoge grünnt hei dei Innere Misschon as Inrichtung vonne evangelsche Kark, ward Baas von't "Ruge Hus" in Hamborg — ein Heim för Jungen, dei up'e scheiwe Båhn kåmen sünd —, sett sik för'n bädere Bedingungen för Insitter in un gehürt tau dei Grünner vonne Reddungshusbewägung. As "Reddungshus" wür ok dei Michaelshoff in Rostock-Gehlsdorf 1845 mit Hülp von Johann Hinrich Wicherns grünnt.

Nådem hei 1832 mit't Studiern fardig wier, fünn hei Anstellung as Lihrer inne Sünndachsschaul vonne evangelsche Gemeind St. Georg an'n Hamborger Stadtrand, lihrnt ok dat Älend von sien Schäulers ut rümmerkåmen Fomilien kennen — un will wat dorgägen daun. Un so grünnt hei in Hamburg-Horn — wecker kennt nich denn Horner Kreisel? — sien Anstalt, üm rünnerkåmen un in'n Ümgang nich lichte Kinner ut ehr Älend ruttauhålen. Taun Johresenn' 1833 harr hei 12 Jungs upnåhmen. Dat würn ümmer mihr, niege Hüs würn buucht. 1835 kåmen dei iersten Dierns tau em un bald läwten teihn bet twölf Kinner as 'n Fomilie mit 'n utbillten "Brauder", hüt seggen wi Diakon. Dat gifft bald Warkstäden as 'n Spinnerie, Schausterie un Druckerie, œwer ok 'n Landwirtschaft. För't Bäden wür 'n Bädsaal inricht't un 1839 keem Wichern up den Infall, ut 'n Rad von 'n Kutschwågen einen Lichterkranz mit vier rode un 28 witte Lichten tau buugen um so dat Täuben up den Hillig Abend tau verkörten. Un disse Lichtenkranz mit 'n Dörchmäter von 2 Meter schmückte inne Adventstiet den Saal in't "Ruge Hus", un jeden Dach dörst ein Licht mihr lüchten.

Doch ierst 20 Johr låters keem dat Dannengräun taun Adventskranz, un so hemm' denn nå un nå dei Kirchgemeinden den Adventskranz œwernahmen as Vörfreud un Tauversicht up dei Ankunft von'n Heiland. 1925 höllt dei Adventskranz Intooch bi dei Kathoolschen. Hei wier nu lütter, harr blot noch vier Lichten un so künnen sik dei Minschen ok tau Hus 'n Adventskranz binnen.

Von Hamborg ut hett dei Adventskranz sienen Wech inne Welt nåhmen. So as 'n Sieger mit Lorbeerkranz schmückt ward, sall dei Adventskranz mit sien Dannengräun all up dat niege Läben in't Vörjohr hendüden un dat Teiken för dei Tauversicht up't ewig Läben sien, dat uns dei Heiland dörch sien Geburt ja bringen sall. Un dei vier Lichten warden mit dat Johannes-Evangelium 8 (12) in't Niege Testament in Verbinnung bröcht, denn dor is tau läsen: "Wedder räd't Jesus nu tau ehr un säd: 'Ik bün dei Welt ehr Licht. Dei mi nåfolgen deit, geiht nich in'n Düsternümher. Œwer hei ward dat Licht hemm', dat Läben gifft." Dei roden Lichten sünd dat Teiken för dei Leif, dei Gott uns dörch sienen Sœhn Jesus Christ taukåmen lött.

Anner seggen ok, dat dei Advent as stille Johrstiet nödig is, üm den Afstand twüschen Pingsten un Wihnachten tau verkörten. Wenn dei Kalenner dat will, denn kann dei ierste Advent — so as düt Johr — all up den 27. Näwelmånd un låtestens up den 3. Julmånd fallen.

Inne Adventstiet warden Päpernœt un Stuten in 'n Åben schåben, Adventssingen un Adventsmärkte hemm' sik inbörgert. Dei Fischer hältern dei Karpen, un wenn dei Gäus nich tau Martini up 'n Disch keemen, denn bestimmt an einen Wihnachtsdach.

In nich mål tweihunnert Johr wür dei Adventstiet tau dat, wat's hüt is. Tau dei Andacht üm den Adventskranz mit rode Lichten gesellen sik Adventskränz un Adventsgebinn' mit Lichten in väle Farwen, taun Bispill in Trendfarwen. Un männigein denkt sik, dat Gläuhwien, Schmoltkauken un Rokwusten gaut för't Wihnachtsfasten sünd. Un von den Hannel un dat Inköpen inne Adventstiet willen wi man gor nich ierst snacken.