Dat kannst mi glööven!
Dat swarte Brett — Naorichten siet 500 Johr …

vun Pastor Johann Christophers, Ilten

To'n Anhören hier klicken:

Lesen deit Johann Christophers.

Dat swarte Brett. In d' School un laterhen in mien Studium een ganz besünner Stääd. Dor weern all de wichtig Saken anschlaan: Termine, wat bekannt to maken weer of wenn wat besünners anstunn. Un in d' Studium ok faker mal, wenn dat wichtig weer, för een Sack up Straat to gahn, um to demonstreeren. Mennigeen deel up disse Brett ok sien Meenung mit. Un klar: wenn dat wat to fiern geev, hier wurrst du dat gewohr.

Ik hebb letztens vör een swarte Brett stahn, up de vör fiefhunnert Johr wat stunn, wat denn de heele Welt verännern sull. Een Böskup, de bit vandaag de Kark noch düchtig bewegt. Wecke swarte Brett ik meen? Dat is een Karkendöör. De Karkendöör in de Schlosskark van Wittenberg. Vandaag is dat nich mehr de olle Döör. Nee, de is verbrannt. Dat liggt al lang torügg. De neije Döör is ut Bronze un is knapp 160 Jahr old. De olle Döör weer ut Holt, un dor kunnst wat drupp fast maken.

Bild: Ludgerd Lüske. Klick up to'n Vergröttern!

Ok wenn man dat nich heel genau weet, wohrschienlich het an disse Dör — de dormolige swarte Brett van de Universität in Wittenberg — Martin Luther sien Böskup, de 95 Thesen anslaan. He wull mit de Gelehrten un de Lüüd van d' Kark diskuteern. He, de Professor van Wittenberg. Dor fung domals de Reformation mit an. Up de neije Döör sünd de 95 Thesen van domaals in Bronze goten.

För Martin Luther sull weer de Bibel in Middelpunkt stahn. Gott hett sien Minschen leev. He maakt, dat mien Leven good word. Up hum kann ik mi verlaten. Wat in mien Leben scheev lööpt, dorkann ik mi nee van freekopen.

Up de swarte Brett van Wittenberg kunn nu jede, de läsen kunn, dat wies worrn, wat he an sien Kark to kritiseren harr.
Letztens is mi upfallen, dat ok bi mien Koopmann in de
Supermarkt een swarte Brett to finnen is. Dor hangen ok Zedels an: mien Katt is weglopen. Ik söök een Babysitter. Ik hebb een Waschmaschin to verkopen. Ik söök een Wohnung. Viellicht sull ik dor ok mal wat uthangen: Sönndag is weer Gottesdeenst; gifft Live-Musik — un een goode Böskupp. Un achteraan noch Koffje un Tee.