20 — C — M — B — 20
Dat "Sternsingerlied" vun Werner Bergengruen in plattdüütsch Spaak un in uns Tieden röverhoolt vun Cord Denker


De Eer mutt sik dreihn, un de Eer hett dat hild,
se danzt dör dat All un hoolt Wiehnacht in't Bild.
Dree König vun wied, wi hebbt Godes in Sinn,
wi seggt ‚Goden Dag' un kiekt eben mal in.

Dree Kronen, dat is uns adventliche Zier,
dree Kronen ut handsneden Goldglanz-Papier.
De Caspar bün ik, un dat is Melchior,
un denn is jo ok noch de Balthasar dor.

Wi stebelt to drütt dör dat lichtblinkern Land
un hebbt för ju all gode Wünschen to Hand.
Nu dreiht wi mal eben den güldlüchten Steern,
un ji markt denn gau: Een Glas Beer harrn wi geern.

Un löppt denn dat Beer uns de Kehlen hendal,
denn töövt wi nich lang op dat annere Maal,
denn kaamt wi doch gliek mit uns Wunschbüdel ran
un wünscht allens Gode för Kind, Fru un Mann.

Wi wünscht för dat Huus, dat de Miete nich stiggt,
un wünscht för den Goorn hier dat sünn'gele Licht,
dat dor wedder Hummeln un Immen in fleegt,
wieldat man Natuur ahn de Giftmischer pleegt.

Wi wünscht, dat de Herr nich den Fortschritt verslöppt,
un dat sien groot Wagen mit Öko-Strom löppt.
De Wienstöck schüllt drägen, un good wees de Wien,
un lang schall he leven, gesund schall he sien.

De Fru drööm vun Urlaub mit Fleger un Schipp,
deit Ümwelt belasten, dorüm unse Tipp:
Villicht deit't jo ok mal de Noordsee ehr Strand,
dor maalt se een Hart för de Tokunft in'n Sand.

Ji Kinner, mit anwussen Smartphon to Hand,
wi Olen, wi bringt ju klimatisch an'n Rand;
man ji sünd de Tokunft un fridags aktiv.
Wi wünscht ju Ideen gegen Sturheit un Miev.

Wi wünscht uns de Eer fri vun Plastik un Schrott,
so as he ehr dacht hett, de Schöpfer, uns Gott.
Mehr Fischen as Müll in de Deepd' vun de See...
Fossil Energie? — Man dor seggt wi uns Nee!

Wi wünscht uns een Tokunft in Wohrheit un Licht,
und wünscht uns een Welt mit een fründlich Gesicht,
dat Recht un Gerechtigkeit allens regeert,
un Freden de Freid op den Eerdball vermehrt.

Nu sünd wi meist mööd, denn dat Wünschen strengt an,
weer good, kääm noch mal so'n lütt Beer to uns ran.
För all unse Wünschen weer dat doch de Lohn,
wi meent dat doch good, wat köönt wi nu noch doon?


5.1.2020


na baven