Dat Felsengraff
Leed för en Fleegtüüch

vun Cord Denker

Se moolt ehr witte Striepen
dor himmelhooch in't Blau,
du kannst dor nich noh griepen,
se sünd di veel to gau:

Doornentied — Passion,
Dood liggt op de Luu'r.
Minschen köönt nich verstohn,
un dat Land liggt dor in Truu'r.

De Minsch — nu kann he flegen
un flüggt vun A noh B;
de Technik ward em drägen:
Dor boben is he free!:

Doornentied — Passion,
Dood liggt op de Luu'r.
Minschen köönt nich verstohn,
un dat Land liggt dor in Truu'r.

Dat Lewen, vun Gott gewen,
dat hett so'n hogen Weert,
dat is een Stück vun'n Heben,
so good, dat man dat ehrt:

Doornentied — Passion,
Dood liggt op de Luu'r.
Minschen köönt nich verstohn,
un dat Land liggt dor in Truu'r.

Een Start un doch keen Ankunft,
een dusendfache Froog...
De Afgrund schluckt de Tokunft,
uns blifft bloots noch de Kloog:

Doornentied — Passion,
Dood liggt op de Luu'r.
Minschen köönt nich verstohn,
un dat Land liggt dor in Truu'r.

Een Felsengraff steiht open,
un Trümmer rings ümto...
Ach Gott, höör du uns ropen,
schick Seelentroost un Roh:

Doornentied — Passion,
Dood liggt op de Luu'r.
Minschen köönt nich verstohn,
un dat Land liggt dor in Truu'r.

Klick op to'n Vergröttern!