Een Wunsch

na een jüüdsche Fabel upschreven vun Rudi Witzke

Vertelln deit Rudi Witzke in vörpommersch Platt.

Lamm, Foto Thomas Max Müller/Pixelio

Söß Daag harr Vadder Gott vun fröh in'n Morgen bit laat in de Nacht rackert un schufft. Nu weer allens trecht: de Heven mit Sünn, Maand un Stierns, Dag un Nacht, de Eerd mit de Grooten Seen un dat Land un alle Planten un Deerten. Morgen wull hei sik maal ornlich verpusten.

As hei sik upklart harr, reep hei avers noch eiß alle Deerten to sik. Gau keemen se all an versammelten sik un lovten un dankten, wat Vadder Gott ehr prächtig trechtkregen harr.

Bloots dat lüttje Lamm stünn wat afsietig un sweeg. Dat kunn sik nich mit de annern freuen.
"Wat's los mit di?", fröög Vadder Gott, "woso büst du so truurig un swiegsam? Kiek diene Maten, de sünd all bannig tofreden."

Aadler. Swedische Schooltafel

"Ach, du groote Gott," anterte dat lütte Lamm, "ik wull mi ja ok giern freuen, avers du hest mi so wehrloos maakt. Jeedeen anneres Deert kriggt mi licht ünner. Jümmer bün ik bang, dat se mi to faten kriegen. Woans kann ik dor mi freuen?"

Vadder Gott hörte de Klaag vun dat Lamm un wull ehm helpen. "Muchst du villicht ok so'ne grooten Tatschen hebben äs de Boor or so scharpe Klaun äs de Aadler?" fröög hei.

Dat Lamm schüttköppte. "Or een scharpes Bitt äs de Lööw or de Wulf?", fröög hei nu.

Lööw. Swedische Schooltafel

Wulf

Wedder schüttköppte dat Lamm.
"Nee, mien groote Meister un Gott," sä dat Lamm liesing, "so'n scharpen Kraam wünsch ik mi nich. Ik harr leever een Waff, dat ik mienen Graam vergeten kann. Mien Waff schall keeneenen annern schaden!"

Nu spröök Vadder Gott: "Wieldat dien Bidd een rechte Bidd is, will ik di helpen. Ik geev di drei Egenoorten, de di helpen warden."

Un Vadder Gott geev dat Lamm Sachtheit, Demoot un Gedüür.

Mien Wunsch to'n Sluß is nu nich, dat ik up miene oolen Daag en Lamm warden will. Dor ward nix vun.

Ik wünsch mi avers, dat mien Lüüd un ik för allens,
wat noch utsteiht,
woll giern so veel as mööglich an Sachtheit, Demoot un Gedüür
mit uns un uns Gegenövers hebben muchten.