Engels in uns Läben:

vun Behrend Böckmann

Dat Wurt Engel kümmt von't lateinsch Wurt "angelus", in't Griechisch heit dat "ángelos" un deit soväl as "Œwerbringer von'n Order" orrer "Apportendräger" bedüden. Nå dissen Wurtstamm hemm' Mätens un Jungs ehr Nåmen krägen, denn Angela, Angelika, Angelina, œwer ok dei Jungsnaams Angelo un Angelino sünd nicks anners as Engels. Engel un Engels gifft dat as Vaddersnåm, un von den einen un annern wür secht: "Ok wenn hei Engel heit, so is hei doch kein Engel wäst". Œwer nich blot Minschenkinner hemm' den Engelsnåmen; dei Engels sünd ok nich buten vör bläben, as Planten un Dierten tau ehr'n Nåmen kåmen sünd. So heit dei Datura "Engelstrumpet" un dei Angelikaplant Engelwurz, up platt ok "Angeliken" näumt. Dei Libelle heit up platt nich blot Schillerbuck, sei hett ok noch den schönen Namen "Engelsspierken". Dat Mätenhorgras orrer Flauschgras (Stipa pennata) ward hier or dor ok Engelshor näumt.

Engels mössten ok inne Malerie so herhollen as dei Målerroos. Raffael, Michelangelo un väl anner Målers hemm' düchtig Engels up Linnen un an Wänn målt, un dei Engelsputten an'n bütersten Rand von dei "Sixtin'sche Madonna" sünd hüt dei Vörlach för Engels up Dosen un Kastens, Pött un Kuppen, Disch- un Bettwäsch, Inwickelpopier un süss noch wat.

Glaswull wür johrelang as Engelshor utgäben un dormit dei Dannenbom anputzt. Hüt ward dat Engelshor sogor all ut ganz fiene güllen Drœ' måkt. Tau bestimmte Tieden wiern Engelsbiller œwer dei Puuch inne Schlapstuwen ganz modern, Engels wiern in Billerbäuker tau finnen un hier un dor stünn 'n Engel ut Potzlan up'n Vertiko orrer ut Steintüch up'n Postament bi't Graff up'n Karkhoff.

Männigein is all mål in'n Krauchwirtschaft "Taun gauden Engel" orrer "Taun blågen Engel" inkihrt, wedder anner denken an den Film "Dei blåge Engel" mit Emil Jannings as Perfessor Immaunuel Rath alias Unrat un Marlene Dietrich as Lola Lola ut dat Johr 1929/30 — ein legendäres Stück Kinogeschicht. Noch anner denken an den Ümweltengel, dei af 1978 as Teiken för dei Ümweltfründlichkeit von Woren utgäben wür un denn up disse afbillt is. Up uns Stråten sünd dei "Gälen Engels" von'n ADAC ünnerwägens un spälen den "Redder inne Not". So is dei Engel nu vonne Bibel inne Marktwirtschaft orrer von'n Häben nu doch up'e Ierd kåmen. Inne Tiedung söcht dei ein orrer anner 'n säuten Engel taun heuråden — orrer för allens wat Spåß måkt.

Engels sünd wedder in dei Utmålbäuker för dei ganz lütten Kinner tau finnen. Engels kann man ok sik sülben knütern ut Öko-Papp un Ökojut' ut Pakistan. Engels kann man köpen. Gråd üm Wihnachten rüm lopen s' besonners gaut. Lüchterengels ståhn inne Finster, Engelskapellen spälen up, Engels fleigen inne Stuwen ümher, Engels as Finsterbiller un noch väl anner Engels ut Plauener Spitzen, ut Blech, Sülwer un Gold, ut Glas un Leihm un Päperkauken... Up Rügen warden in ein Pötterie Engels mit'n erotisch Utseihn hupenwies verköfft.

Sei sünd all nå ehrn Naam "Œwerbringer von'n Order", Bottschapers, œwer nich miehr mit ein Bott von Gott. Ehr Botten sünd von ünnerscheedlichste Art, mennigmål sünd sei ganz von düsse Welt un bloots op Geld ut.

Un denn is dor noch dat Geschäft mit dei Schutzengels. Dorœwer snacken wi neegst Mål.