Engels in uns Läben:
Wat sünd Schutzengels?

vun Behrend Böckmann


"Fohr nich fixer, as dien Schutzengel fleigen kann!" is an'n Auto vör mi tau läsen. Karjoolt denn einer sien Auto an'n Bom un sticht sülben mit'n lütt Schramm ut, denn ward gliek secht: "Dei hett œwer 'n Schutzengel hadd!" Dat secht man mierstens, wenn einer bi 'n Unglück nich tau Schåden kümmt. Un so kümmt all dei Fråch up, wat dat denn mit Schutzengels up sik hett. Man künn sik dei Antwurt licht måken un seggen, disse Ort Engels sünd nich blot tau Wihnachten Mod', ne, sei sünd dat ganze Johr œwer tau Geld tau måken. Taun Geburtsdach, wenn einer ut'n Krankenhus kümmt orrer endlich wedder wat tau daun kriecht, warden Schutz- un Glücksengels verschenkt. För lütte Kinner gifft dat disse Engels ut Plüsch taun Kuscheln, dat gifft Schutzengelbiller up Däuker un Decken, Tüten un Popier, dat gifft dat Krüz mit den Schutzengel un dat gifft den Schutzengel as Schlœtelanhänger; wi finnen den Schutzengel von Hummel up'n Ünnersetter ut Potzlån, dat gifft den Schutzengel as Autoupbackser, dat gifft Schutzengels ut allens, wat sik tau Geld måken lött. Anne Schutzengels möt doch wat dran sien, denn süss wür doch nich uns Bundspräsident dei lütten Geschwister von Soldaten in Masar-i Scharif/Afghanistan taun Schutzengelknütern inlåden, dei fardigen Schutzengels denn sülben "signieren" un up'e Reis an'n Hindukusch bringen!

Gifft dat würklich disse Lockenköpp in'n Nachthemd, dei œwer uns schwäben un up uns uppassen? Sünd sei würklich dor båben bi Gott as dei Unstarwlichen un wåken œwer uns Starwlichen? Sünd sei würklich dei Geist- un Lichtwäsen, dei ümmer vonne Tügung bet taun Dod anne Sied von'n Minschen gåhn orrer sogor in em wåhnen; hett jeder Schutzengel würklich blot sienen eigen Minschen un måkt dei Schutzengel würklich so wat as'n Seel ut? Is dat würklich so, dat in den Momang, wo dei Minsch anfangt Fleisch tau warden, dat göttlich Wäsen as Engel sien Seel utmåkt un em nie nich wedder verlött? Dei einen nennen dit "Inkarnation", anner schnacken von esoterisch un astrologisch Düdungen un hollen dat för Späukenkiekerie, wenn einer dorvon schnacken deit, dat hei mit sienen Schutzengel Verbinnung upnähmen kann.

Twei von drei Dütsche sallen œwer an ehren Schutzengel glöben, hei gifft disse Minschen dei Säkerheit, dat's Glück hemm' kœnen, wenn't Unglück sei dräpen deit.
Un dor dei Minschen sik dat denn doch nich so ornlich verkloren kœnen, woans dat mit den Schutzengel in'n Minschen is, låten s' em doch leiwer schwäben un hemm' em Flœgel gäben. In Schutzengel-Riemels låben Minschen ehren Engel, dat hei sei dörch't Läben drågen deit, œwer väl mihr frågen em: Worüm hest du mi verlåten, worüm bün in nu ein follener Engel, worüm hett man mi as Engel dei Flüchten bråken, worüm heff ik di verlurn usw.?

Inne kathoolsch Kark spälen Schutzengels hüt noch 'n grote Rull. Siet 1670 is dörch Order von Papst Clemens X. dei 2. Saatmand (Oktober) dat Schutzengelfest un an dissen Dach bäden dei Kathoolschen up lateinsch tau ehren Schutzengel: "Angele Die, qui custos es mei, me, tibi commissum pietate superna, illumina, custodi, rege et guberna. Amen." (Engel von Gott, dei du mien Bewohrer büst, Gott hett di schickt, an mien Siet tau sien: Måk mi klauk, holl dien Hand œwer mi, stüer un lär mi. Amen.)

Ik för mienen Deil fråch mi blot, wo sünd dei Schutzengel bläben, wenn ein Ollsch as Engelmaker son'n ganz lütt Wörming tau dei Engel up Reisen schickt hett un dorbi noch dat Läben vonne Mudder up't Späl sett hett? Hier schlöcht nå Jean Paul dei Engel vonne tweite Stunn — dei Dodesengel — ihrer tau, as dat dat Läben dörch 'n Säuten von 'n Engel inne ierst Stunn sienen Anfang nähmen däd. Un dat mach ok för dei Dodesengel in männig Ollenheim gellen.


19.3.2023


na baven