50 Johren Bologneser Nudeln

vun Meike Balzer-Fraun

"Menü" — Die schönsten Rezepte der Welt —
ab 1971 — 130 Sammelhefte —
wöchentlich ein neues Heft für 2,50 DM —
Vertrieb Gruner&Jahr

Dat weer ja mal wat! Alleen all de bunten Biller!
Kaken heff ik bi mien Oma lehrt — ahn Rezepten. To'n Kokenbacken harrn wi dat ole brune Dr. Oetker Schulkochbuch in Swatt-witt un en Barg Zeddels in de Kökenschuuvlaad.

De Menüheften heff ik kumplett sammelt, un en Bookbinnersche hett mi later ölven feine Böker dorvun maakt. To de Tiet weer dat en düren Spaaß, man ik heff jümmers noch mien Freud doran.

1973 keem mien Fründin mit ehren Keerl op Besöök. Ik wahn noch bi mien Öllern un wull nu för mien Keerl, uns Besöök un mi wat Besünners kaken.
Kaken na Rezept un blots för veer Lüüd weer ik nich wennt. Wi harrn allemal söven an'n Disch.

Aver de "Bologneser Nudeln" hefft mi toseggt. Harr noch nie nich italieensch eten, ofschoonst dat woll Enn 1960 al en italieensch Restaurant in Bremen geev. (Wat de Buer nich kennt, …) Dat schull sik nu ännern.

So veel Nies in dat Rezept! För Salami, Olivenöl un Parmesankees mutt ik mit'n Tog na Karstadt in Bremen hen. In uns Konsum harrn se dat nich. Knuuflook harr ik noch nie nich in de Hand hatt. Bi uns keem nich mal "Gekochte mit" op'n Disch.
Een Tehn, seggt dat Rezept. Zibbeln, Sellerie, Wuddeln, Fleesch, Rotwien un Lorbeerblööd weren ja nix Besünners, man Spaghetti kenn ik ok nich. Blots Makkaroni un de lütten Suppennudeln.

De Zibbeln hacken, Grööntüüch rieven, allens kloor. Man so'n Knuuflookdings dat weren ja bannig veel lütte Stücken. Wat'n Arbeit, de all to schellen. Denn anbraden, röhren, Wien un Water ran, röhren, beten Water ran, röhren, beten Water ran, röhren. Man, wat duer dat. Wat'n Opstand för so'n beten Sooß!
Aver dat rüük heel besünners, un lecker weer dat ok.

Mien Fründin ehr Fründ kenn de Sooß ut Italien, un he weer hen un weg, dat ik dor so veel Knuuflook rindoon harr. Kunn ik denn weten, dat en Tehn blots een so'n lüttet Stück is?

Mit de Johren geev dat denn ja de Todaten ok in de Supermarkten, un de Bologneser Nudeln woorn uns Dochter ehr leefstet Boortsdagseten. "Wir gehen doch nicht zu McDonalds! Ich habe Geburtstag, da kocht meine Mama Bologneser Nudeln!"

De Leevde hett se ehr Jungs mitgeven. De sünd 15 un 12, un ik mutt 'n Barg mehr kaken as in dat Rezept vun 1973. Reven Wuddeln un Sellerie heff ik nu jümmers in't Iesschapp, un wenn wi tosamen in'n Oorloff fohrt, sünd twee Packen ieskoolt Bologneser Sooß uns Köhlmiddel in de Köhltasch un denn dat eerste Avendeten in't Ferienhuus. Dat smeckt winters in'n Snee in Öösterriek jüst so as sommers an de Oostsee in Däänmark.

"Spaghetti Bolognese" is ja middewiel en Allerweltseten, man bi uns to Huus geneet wi jümmers noch "Bologneser Nudeln".