 |
Op ole Weeg un Brüchen:
Vun Süderstapel na Rendsborg Na Deel 1: hier Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
In Süderstapel weern en ganzen Barg niege Lüüd tostegen. Wi müssen uppassen, dat uns Plätz nich besett wöörn. De niegen Fohrgäst lepen överall rüm un sabbeln fix dörcheenanner. Dat weer seker en Verein ut de Ümgegend. Se snacken all Platt. Goot, dat de Fohrt wieder güng.
De Regen harr 'n beten wat nalaten, so dat wi uns an Deck truut hebbt. De Utsicht vun Deck weer beter. Vun dor kunnen wi unsen Gasthof in Süderstapel up den Geestrüüch liggen sehn. Aver lang hebbt wi dat nich uthollen. Wind un Regen hebbt uns wedder in de Kajüüt dreven. De Ansegger verkloor uns jüst, dat fröher in natte Johr'n un bi Stormfloten dat ganze Land rechts un links vun de Eider mit Water bedeckt weer. Dat Land harr utsehn as en groten Binnensee. Dormit dat wedder afdrögen kunn, wöörn Pumpwarken buut.
Wi kemen graad an dat grote Pumpenwark Steinschleuse vörbi. Dat weer 1912 buut woorn un sull de Sorgeneederung un dat Land an de Eider vun Water frie maken. Up de Wiederfohrt hebbt wi noch eenige lütte Pumpstationen an't Över sehn. Wi föhrn dörch gröne Wischen, up de dat Vehwark sik satt freten kunn. Störk stolzeern dörch de Wischen un angeln sik Poggen ut de Pipen (Entwässerungsgraven, "Pipeline"). So wöörn de Gravens nöömt. Mien Onkel müss ümmer to'n "Pipenklein". Al siet vele hunnert Johr'n rackert sik de Minschen af, sorgt dorför, dat düt Land dröög blifft un nich ünnergeiht.
De Eider slängel sik meist as en Slang dörch dat satte Gröön. Mitünner meen man dat anner Enn vun de Eider wedder tofaat to kriegen. Un düt weer to Tieden vun den Eiderkanal de Verbinnung von de Oostsee to de Noordsee! Woans hebbt de Scheep ahn Motor mit Segel dat blots maakt, wenn se in Rendsborg de letzte Slüüs verlaten harrn? Bit Rendsborg geev dat richtig Treidelweeg. Bit dor wöörn de Scheep bi slechten Wind vun Peer trocken. Aver nu weern blots noch feuchte Wischen rechts un links vun de Eider, keene fasten Treidelweg. De Scheep up de Ünnereider müssen up günstigen Wind töven un segeln. Oder se müssen mit en Sleeptau vun Minschen trocken warrn. Lüttere Scheep kunnen ok dörch Staken wiederkamen.
Dor harr uns "Adler Princess" mit Motor dat lichter. De harr den neegsten Bagen vun de Eider al schafft. Sehg meist ut, as wullen wi wedder na Tönning föhrn. Intwischen harr de Wind de dichte Wolkendeek uteenanner pust. De Sünn versöch en Lock to finnen. Gau weern alle Gäst an Deck. Sülvst dat anseggte Kaffee-buffet kunn se nich ünner Deck hollen. Baven kunnen wi wiet in't Land kieken. Dörper legen an de Kimm. Dicke Wulken türmen sik över de Hüser. Na den velen Regen weer dat en richtig Vergnögen.
Nu wöör de neegst Sehenswürdigkeit ankünnigt: De Klappbrüch vun Pahlen! De Brüggenwärter harr de Klappen al för uns Schipp upmaakt. Rechts un links töven vele Autos. — Vör vele Johrn weern wi mit uns Auto över düsse Brüch föhrt. Wi wullen de Eider bekieken. Lütte Bote legen an't Över un en Boot schipper up de Eider. Aver wi söchen enen Gasthoff. Wi weern al teemlich lang ünnerwegens west. De Hunger dreev uns dormals dörch Pahlen. Möhlenflögel locken uns in't neegst Dörp. To Eten hebbt wi nix kregen, aver en gode Tass Kaffee. De Möhl in Dörpling weer en Ferienwahnung un keen Lokal.
Wat goot, dat wi up Schipp wat to Eten kregen. Hungern müssen wi nich. Uns Fohrt up de Eider güng nu ok bi Sünnenschien wieder. De Eider kreeg Verstärkung vun de Sorge. Denn kemen wi an de Affohrt in den Giselau-Kanal. De Eider weer för uns' Schipp nich mehr breet noog. De Giselau-Kanal weer de Verbinnung to'n Kiel-Kanal (Noord-Oostsee-Kanal). Vörher müssen wi noch de Lexslüüs passeern. Ok dor weern för uns Schipp al de Klappen vun de Slüseninfohrt hoch.
Nu harrn wi dat bald schafft. Vör uns harrn wi blots noch de Slüsung to'n Kiel-Kanal dörch de Giselauslüüs.De Sünn harr sik wedder verkrapen. Dat regen, regen, regen! Dörch de Slüüs kemen wi ahn Schereree. Un nu harr de "Adler Princess" bit Rendsborg up den Kiel-Kanal frie Bahn. An de Utfohrt vun de Slüüs keem uns noch en smucke Segeljacht in de Mööt. De wullen seker na Tönning. Wi harrn blots noch uns Trüchfohrt mit den Bus na Tramünn in'n Kopp.
In Rendsborg leeg an den Kai vun den Kiel-Kanal ünner de Rendsborger Isenbahnbrüch dat Swesterschipp, de Raddamper "Freya". Wi dampem vörbi, ünner de Brüch dörch in den Obereiderhaven. An niegen Kai ünnerhalv vun St.Marien möök de "Adler Princess" bi Regenweder fass.
Wi hebbt sehn, dat wi gau in den Bus kemen. Negen Stunn hett de Fohrt dweer dörch Sleswig-Holsteen duert. To Tieden vun den "Olen Eiderkanal" weern de Scheep dree bit veer Daag ünnerwegens. Dor hett sik in de Twischentied doch so allerhand ännert.
|
||||||||
|
|
