Op ole Weeg un Brüchen:
De Ole Eiderkanal: Vun Rendsborg na de Noordsee

Deel 4
vun Antje Heßler

Vun de söss Slüsen över den olen Eiderkanal sünd noch dree Slüsen mit de olen Slüsenmuren erhollen: De Rathmannsdörper, de in Klein-Königsförde un de in Kluvensiek. Se gellen in ehr Tiet as de Besten. Se harrn all twee Slüsenkamern, en Schippsslüüs un en Frieslüüs. De Frieslüüs reguleer den Waterstand in den Kanal. In de Schippsslüüs wöörn de Scheep üm 2,50 m anböört oder up dat Niveau vun de Ünnereider afsenkt.

Rathmannsdörper, ...

... Königsförder ...

... un Kluvensieker Slüüs

De Rendsborger Slüüs harr blots een Slüsenkamer. Se müss den Tidenutgliek twischen Noord- un Oostsee reguleern. Vun de Slüüs is blots noch dat ole Slüsenbecken erhollen.
De annern dree Slüsen staht ünner Denkmalschutz. Mank de Slüsen sünd noch korte Afsnitte vun den eenstmals 34 km langen olen Eiderkanal erhollen. Mit Hölp vun de söss Slüsen wöör de Höhenünnerscheed vun söven Meter twischen Holtenau un de Obereiderseen överwunnen.

1 Holtenau
2 Knoop
3 Rathmannsdorf
4 Königsförde
5 Kluvensiek
6 Rendsburg

Rendsborg: Ole Kaimuur

Vun Rendsborg güng de Fohrt up de Eider wieder na Tönning un denn in de Noordsee. För en Fohrt vun Holtenau na Tönning un annersrüm brukte man dreeunhalv Daag. Weer de Wind ungünstig, müss treidelt warrn. Dat heet, dat Schipp müss vun Peer — mitünner ok vun Minschen — trocken warrn.

Ümmer wedder weern wi begeistert vun dat Meisterwark. De ole Eiderkanal weer de eerst Waterstraat twüschen Noordsee un Oostsee för seegängig Scheep. Mit den Bu hebbt se 1777 in Holtenau anfungen. 1784 in'n Harvst weern se mit alle Buarbeiden torecht.

Packhuus in Rendsborg mit Kraan an'n Gevel

Siedenfront vun't Packhuus in Rendsborg

Nu wullen wi uns noch de dree erhollen Packhüüs in Holtenau, Rendsborg un Tönning ankieken. För de Woren, de mit de Scheep befördert warrn müssen, weern de Packhüüs extra buut woorn. Dat Packhuus in Holtenau kennen wi al. Dat weer hüüt en fien Gasthuus. Nu weern wi nescheerig up de Packhüüs in Rendsborg un in Tönning.
Dat Packhuus in Rendsborg weer ümfunktioneert un weer en ganzen Stoot en Möbelhuus. In Ogenblick is ungewiss, wat ut dat Packhuus warrd. In de Buwies weern de dree Packhüüs teemlich gliek. Se müssen veel Ruum för de Fracht hebben, de vun Oost na West un in de anner Richt befördert warrn sull.

Dat Tollhuus is doch toll, nich?

Neven dat Packhuus vun Rendsborg stünn noch dat olle Tollhuus mit dat däänsch Wappen. För de inlagerten Woren müss en Packhuusmiet betahlt warrn. För utländich Woren wöör dormals ok al Toll verlangt. Dorför weer dat Tollhuus buut woorn. Sehenswert weer de gussisern Frietrepp vör dat Tollhuus. Herstellt weer se in de Carlshütte in Büdelsdörp bi Rendsborg.

Emblem an't Tollhuus

De gussiesern Frietrepp, baven en Detail

Seesiet vun dat Tönninger Packhuus

Kraan vör dat Tönninger Packhuus

Den gröötsten Indruck hett aver dat Packhuus vun Tönning up uns maakt. Dat liggt direkt an de Eider up enen Diek an den historischen Haven vun Tönning.

Vör dat Packhuus steiht en olen englischen Kran. In den Haven liegt Oldtimer. De warrd in en lütte Werft restaureert. Wenn Ebbe is, sitt de Scheep all up den Slick fast un mööt up dat neegst Hochwater töven. Wi weern ganz begeistert vun dat Ümfeld.

Packhuus Tönning

Haven in Tönning bi Ebbe, achtern dat Packhuus

Dat Packhuus vun Tönning is noch in den olen Tostand un warrd för allerhand Veranstaltungen nütt. De annern beiden Packhüüs in Holtenau un Rendsborg sünd in de Twischentied ümbuut. In dat Tönninger Packhuus is noch de grote Stauruum erhollen un beet sik för Veranstaltungen an. Wi weern to en Utstellung vun Motorrööd dor. Dor weer villicht wat los! Kuum dat wi uns Auto afstellen kunnen.

To Wiehnachten deent de Butenfront mit de velen Finster för den gröötsten un längsten Adventskalenner. Dat warrd jedes Johr in't Fernsehn överdragen.

An de Frontsied na Noorden to is en Messingtafel anbröcht. Dor kann man nalesen, wann dat Huus un to welchen Zweck dat buut woorn is. Wi weern mächtig beindruckt vun dat Packhuus an den Tönninger Haven.

Haven in Tönning bi Ebbe, achtern dat Packhuus

Mit de Tiet wöörn de Scheep ümmer gröter. Se kunnen bald den olen Eider-Kanal nich mehr passeern. Dor müss en grötern Kanal buut warrn. De Nafolger weer de Kaiser-Wilhelm-Kanal. Hüüt kennt wi em ünner Kiel-Kanal! Deelwies wöör dat Bett vun den Olen Eider-Kanal in den niegen Kanal mit inbetrocken.

Warft in Tönning

Wi lang de wull noch för de immer gröter warnden Scheep utriekt? Deper hebbt se den "Kiel-Kanal" al öfter maakt. Nu sall he wedder breder maakt warrn! Bi en Ümbu is en Deel vun mien ole Heimat in den Kanal fullen!

De Eiderkanal seggt Adjüs mit en Avendstimmung