Stamptüffeln un solten Hiering

vun Günter Weber


Gistern wier dat werrer sowiet. Ik schnie den Rasen. In den Rasenplack is so enen runden Pleck Roden Sür in. Nu is hei bi enfallen. Op is op. De Kanten mutt ik immer fein snieden. Gott jo, doar füllt mi ja ok ümmer wat in. Rhabarber, Summerdag un Meddageeten in dat lütte Dörp in Meckelborg. In disse Tied gäw dat tominnst tweimol inne Wäk Stamptüffeln, solten Hiering un den berühmten Rhabarber. Stamptüffeln kennte mien bestes Stück nich, as wi uns kennen liernten. So warrt dat mokt: Enen groten Pott vull Solttüffeln. In de grote Pann käm würfelten Speck, de wier ok nich miehr de jüngste. Dorbi noch Zipollen (Zwiebeln). Uns Oma hett so enen groten Stamper hatt, den heff ik inne Smä all pormol schweißt. Manchmol wier deSpeck un ok de Zippel op den Riesenherd al beten schwart worrn. Dat makte nix ut — allens in den Tüffelpott! Ik heff dat ofteins stampt, wieldat uns Oma ja nicht de Kräft hatt hett.

Jeden Sünnabend güng uns Oma in'n Sommer na den Konsum, den sei in den Saal von die Gaststätte Bunterbart inricht harrn. Geld hett sei ümmer hatt. Oma un Opa kregen Rente. Jeder 114 DDR-Mark. So ab negenunveertig. Dat hett noch lang nich jedereen hatt! Sogar de Parteisekretär hett uns Oma Geld pumpt. Wat wier unsen Opa doch füünsch, as hei dat tau weiten kreeg! Sei hett sogar noch spoort vun den Eierverkoop. Ik mal twei Eier eeten? Dink nich dran! Neven de Flasch Pepermintlikör un en Päckchen Tabak nähm sei ok ümmer 8 bet 10 solten Hiering ut de Tunn in'n Konsum.

Ik heff de oft saubermaakt, as ik meddags ut de Smä komen bün un swemmen wull. De Dierns wachten all an't Waater. Den halven Sünnavend rüükte ik na Hiering. De Haarcreme „Brisk“ kunn dat mit ehrn Duft ok nich voll verdecken. Sünnavend Avend op den Danz in Breest, Golchen, Selz, Daberkow, Bartow rüükte ik denn beeten na 4711. Uns Oma kreeg so‘n Püsterflasch von ehr Dochter,mien Tant, ut Hamburg. So’n beeten achter't Ohr, dat verfehlte sien Wirkung nie nich.

Trüch na de Stamptüffeln, tweemol inne Woch. Den solten Hiering heff ik also sauber makt. Oma richtete den Sud an: Water, Solt un Zucker un Zippel gewürfelt. Jede Menge. Dor käm de solten Hiering rin, wenn hei twei Dag watert worrn weer.

Mittwochs un Friedags in'n Summer, tau Beginn vun de föftiger Johr, Stamptüffeln, solten Hiering n as Krönung Rhabarkommpott. Ik kust dat nie nich miehr seihn.

Un nu? So alle veerteihn Daag friedags op den Markt: Pelltüffeln un Matjes.

So ännert sik de Tieden.


De Tollens


Fotos Hiering: Antje Heßler
Foto Tollense: Wikimedia Commons, © Botaurus Stellaris
4.1.2017

 


na baven