Logo "Wunnerwarken in Mäkelborg"Wunnerwarken in Mäkelborg, Deel 39:

Dei Panzer T-34 — sien Denkmal in Lalendörp

vun Hans Jürgen Grebin


Disse Panzer von denn Typ 34 hett in'n 2. Weltkriech in dei sowjetisch Armee ein bedüdend Rull spaelt. In dei DDR wüürn mit uutrangierte Panzer Denkmale uutstatt, üm dei doden Soldaten, dei för ehr Land un gägen dei Nazis follen wieren, tau iehren. Ook in Rostock stünn so ein Panzer von Typ 34 ("T-34") — inne Straat von dei Befreiung dicht bi dat Witte Krüüz, hüüt werrer Tessiner Straße. Dei wier an'n 8. Mai 1975 tau Erinnerung an dei Befreiung as Denkmal upstellt worrn. Von hier kaemen in'n Mai 1945 dei Befreier.

Na den Umbruch in dei Johre 1989/90 wullen dei Bestimmer dorvon nix miehr weiten un lötten dei sowjetischen Panzer, dei an väälen Uurten in dei niegen Bundslänner stünnen, wechschaffen, besiedigen. Fröher hett man dortau Billerstürmerie secht.

Nur in Lalendörp, an dei Straat twüschen Güstrow un Teterow, wier dat anners. Hier bestimmte dat "Volk mit ehre Obrigen", datt dei T-34, dei ann Kampf üm Berlin deilnahmen harr, up'n Sockel stahnbliwwt. In dei Neech befinnt sick ein Iehrenfriedhoff för dei russischen un ook annere Soldaten. Vörher harr ein Börgerbefragung (20. Oktober 1992) stattfunnen un dei Börgers meinten, dei Panzer süll blieben. In Mäkelnborg-Vörpommern — un ick kann woll schrieben, ook in dei annern Bundslänner — harr dat sowat nich gaeben, wiehr dat einmalich.

Un as dat so is: Achterna is dei Minsch kläuker. Hüüt sünd dei Lalendörper un all Mäkelnbörgers stolt op ehr Denkmal, dat sik ook hüüt noch — un leider ook al wedder — as Mahnung gägen dei Gefohr von Faschismus un Krieg steilt un tau'n Fräden mahnt. So nödig, as dat alltied wier.

30.7.2023


na baven