 |
|
vun Behrend Böckmann Na den Sünnenfall in't Paradies ward Eva Mudder von Kain un Abel. Un siet disse Tiet hett sik nix doran ännert, dat dei Fru dei Kinner kriecht, dei lütten Wörms an'n Bossen lecht un dorför bäten Ihrung verdeint. Sülfst inne antike Götterwelt wür all Rhea, dei Göttin för Fruchtborkeit as Modder von Zeus, Poseidon un noch vier anner Götterkinner verihrt. Inne niege Tiet hett denn dei Amerikanerin Ann Maria Reeves Jarvis (1832-1905) Anlop taun Mudderdach nåhmen. As Fru von 'n Preister süht sei Kinner mit Krankheiten upwassen un beläwt, dat Müdder ut'e Nord- un Südstaaten in'n Amerikanschen Börgerkrieg (1861 bis 1865) dei Tranen leepen, wenn ehr Soehns as Krüppel orrer gor nich ut'n Krieg nah Hus taurüch keemen. Üm dit Älend tau linnern, grünnt sei all 1865 den "Mother's Friendship Day" un ward dormit tau dei Modder von'n Modderdach.
Twei Johr na den Dod von Ann Maria Reeves Jarvis keem ehr Dochter Anna Marie Jarvis (1864-1948) up den Infall, in ehr Medthodistenkark an'n 12. Maimand 1907 'n Ihrengottesdeinst för ehr Mudder aftauhollen. Dat hett ehr Maud måkt, un 1908 geef dat den iersten Mudderdachsgottesdeinst. As Teiken för dei Ihrung von all dei Müdder hett's 500 witte Näglein aflecht. In anner Johr geef dat mihr as 10.000 Näglein, rode för dei läwenden Müdder un witte för all, dei nich mihr ünner dei Läbenden wiern. Un so hemm' dei Methodisten, dei ehr Läben mihr anne Bibel utrichten as anner evangeelsche Christen, all 1909 in 45 Staaten den Mudderdach fiert. Un sei hemm' dörch Petitschonen Woodrow Wilson (1856-1924), von 1913-1921 dei 28. Präsident vonne USA, dorhen bröcht, dat dei Kongress den 8. Maimand 1914 tau natschonalen Fieerdach utreep. Von nu an geef dat den Mudderdach inne Staaten, un hei keem 1927 inne Schwiez, 1918 in Finnland un Norwegen, 1919 in Schweden, 1923 in Düütschland un 1924 in Oesterriek as Fieerdach up. Hier ward hei an'n tweiten Sünndag in'n Maimand fiert. Un dei Blaumengeschäften, dei Pralinenherstellers un vele Müdder frein sik.
14.5.2023
|
