 |
Op ole Weeg un Brüchen: Povls Bro un Gejlå Bro vun Antje Heßler Se köönt de mehrsten
Fotos per Klick vergröttern. Trüch kaamt Se denn mit den
Zurück-Knoop op de Browser-Symboolliest.
Dittmal weer uns Ziel en ole Feldsteenbrüch, Povls Bro över den Bjerndrup Mølleå. Se leeg an en olen Heerweg, de ut Noordjütland keem.
De olen Weeg güngen ut praktische Gründ över de Höhenzüge. So müssen de Minschen mit ehr Veehtüüch nich to oft de Waterlööp queern. Dat geev aver Utnahmen. Up unsen Prospekt weern dree ole Brüchen intekent, de Immervad Bro, de Povls Bro un de Gejlå Bro. Düsse Heerweeg wöörn later as Ossenweeg beteken. De Immervad Bro weer för uns to wiet na Noorden.
Dat weer gor nich so eenfach, de ole Feldsteenbrüüch över den Bjerndrup Mølleå to finnen. De lütte Fluss weer up uns Koort inteken, denn harrn wi bald funnen. Aver de Brüch kunnen wi nich finnen. En poor Daag vör uns Fohrt har dat veel Regen geven. De Wieschen neven den Bjerndrup Mølleå stünnen ünner Water. Ümmer wedder müssen wi na den Weg fragen. Un dat geev mehr Brüchen, as wi dacht harrn.
De Weeg wöörn ümmer smaller. Dat weern blots noch Feldweeg. Köh un Peer stünnen up de överswömmten Wischen an Wegrand. Se keken uns nescheerig an. De kunnen wi nich fragen. Dor Meddagstiet weer, begegen wi kuum Minschen. De meisten wüssen so un so nix vun de Povls Brüch un tucken mit de Schullern.
Endlich drepen wi up enen Hoff enen Mann. De kunn uns Utkunft geven. He hett uns den Weg up den Hofplatz mit enen Stock in de Eer ritzt! Mitnehmen kunnen wi em nich! Den Plan müssen wi in Kopp behollen. Mien Mann wull ünnerwegens al mal de Fohrt upgeven! Aver nu güng dat wieder. Över en staatschen Gutshoff föhrn wi dörch enen lütten düstern Woold.
Den Bjerndrup Mølleå harrn wi ut de Ogen verloorn. Datt güng över Steen un dörch Slaglöcker dull bargdaal. Un dor, an't Enn vun unsen Weg, wöör dat hell. Sehg meist ut, as wenn uns een de Döör upmöök. "Du, dor ünnen is wedder uns Bjerndrup Mølleå un ok uns Brüch!", reep mien Mann. Un de Beek föhr veel Water. Dat rausch ünner de Brüch dörch. Ganz vörsichtig sind wi över de Brüch föhrt! Dat weer villicht en Geföhl! Över düsse Brüch weern al siet hunnerte vun Johrn Minschen mit ehr Veeh trocken un mit ehr Ossenkoorn föhrt. Un nu föhr'n wi mit uns Auto över de Brüch!
Neven de Brüch weer en Parkplacken mit en Bank un enen Disch dorvör. Dor weer ok en Schautafel opstellt. Op de Tafel stünnen de Daten över de Brüch. Leider blots allens in Däänsch! Nahdem wi uns wat verhaalt harrn, hebbt wi uns de Brüch vun alle Sieden ankeken. De groten Granitsteen weern ahn Mörtel övereenanner leggt. Likers weer se seker! Kunn grote Lasten drägen.
As wi uns över de Brüch ünnerhöllen, wanner en Fru mit ehr'n Wanderstock över de Brüch. Se keem vun de Immervard Brüch över den olen Pilgerweg un wull nu wieder na de Gejlå Bro. Dat weer en ole Bagenbrüch ut Granitsteen, aver mit twee Bagen. Op de Schautafel von de Povls Bro weer se ok afbildt. Se gellt as de schöönst Steenbrüch Dänemarks. Dor müssen wi doch hin.
Den Weg hett uns de Fru noch genau verkloort. Dat weer en richtig niemoodsch Autostraat. Likers hebbt wi uns noch eenmal verföhrt. Wi harrn de falsche Richt inslagen. As wi mitkregen, dat wi blots in de Richt vun de düütsch Grenz föhr'n müssen, kemen wi gau vörran. An enen Krog mit den Naam Bommerlund vörbi güng vun de Hauptstraat en Wegwieser na de Gejlå Bro.
Över en groten mit Gras bewussen Parkplacken sünd wi up en Stück von den olen Ossenweg dicht na de Brüch föhrt. Vör de Brüch weer de Weg mit Pieler afsparrt. Dor kunnst blots to Foot över de Brüch kamen.
De beiden Bagen hebbt wi uns vun beide Sieden ankeken. An enen Steen weern noch de Bohrlöcker uttomaken. An't Över leeg ok noch en vun de Steen. Ümmer wedder staunen wi över de Technik, dat de Minschen dormals al so gode Brüchen buut hebbt.
Op den Trüchweg na uns Auto wöörn wi noch enen groten Gedenksteen wies. En Riedersmann in Uniform un en junge Fru weern dor op to sehn. Dor ünner stünn dat Johr 1760-1960 un Bommerlund. De Saag vertellt, dat de Riedersmann, en Franzoos, sien Reken nich betahlen kunn. Dorför hett he den Wirt dat Rezept för den Bommerlunder överlaten.
Sietdem wöör lange Tiet de Bommerlunder vun de Brenneree Berentz, later von de Brenneree Herm Dethleffsen nöördlich von Flensborg brennt.
|
