Seemannsgarn:
De Swimmingpool mit de lange Waterrutsch

vun Günter Sohnemann


Vör Surabaya legen wi op Reede un töven op en Leegplatz an de Pier to'n Be- un Entladen vun de Darmstadt. De Hitten weer legendär, un in de fuchtige Luft leep de Sweet in Strömen.

Dorför keem dor de düütsche Seemannsmission an Bord, de in Surabaya en Staschoon harr. Se been uns en Utfloog in en höger leggen Oortschap an, 'neem dat Klima en lütt beten köhler un dorwegen beter uttohollen weer. Wi sään dankbor to.

Mit dat Auto güng dat na de ehmaligen holländschen "Sommerhüüs" in de Bargen. De olen Kolonialisten wüssen ok, woneem dat sik moi leven leet! — Dor ankamen, geev dat eerstmal en godes indoneesches Eten in en Hotel.

Mi verlock de Swimmingpool mit en superlange Waterrutsch. Jedereen vun uns wull de Eerste op de Rutsch ween. Un ik weer de Sieger! Leider.

Vun de Waterrutsch floot en lierlütt Rinnsal Water in de Merrn vun de Rutsche dal in den Pool. Ik sett mi dorop. De Rutsch güng lang, avers steil in't Water. Oh, düsse Rutsch! Mien Moors füng an to brennen as Füür. Schriegen vör Pien lann ik opletzt in't ieskole Water, un dor wull ik ok gau wedder rut. Wat weer passeert? — Dat Rinnsal weer to minn, un mien Achtersteven weer dör de Reibung so hitt woorn, dat ik an Moors un Hacken richtig brennen rode Stellen harr. Un dat dat Water ieskoolt ut de Bargen keem, sett mien Badelust ok gau en Enn.

Denn doch lever arbeiten in de Stickenhitt.


29.10.2022

 


na baven