De Schokoboys

vun Heinz Tiekötter


In'n Juli 1964 lösch de "Tannsteen" vun'n Norddütschen Lloyd an Schuppen 71 ehre Lodung ut Zentrool-Amerika. In dat ünnere Twüschendeck vun Luuk 3 legen 185 Tünnen Kakaopulver in Papiersacken. De sullen vun dat Schipp direkt in Iesenbohnwogens gohn. Kakaopulver is veel lichter as Mehl, meist so, as de Stoff ünner dien Sofa. De Sacken weern groot as Fedderbetten un bruken veel Platz. As Löschgeschirr harr de Staueree grote Plattformen an ieserne Keden in de Luuk stellt. Dorop müssen de Sacken nu so stopelt warrn, dat se nich dolrutschen kunnen, wenn de Kaikroon se ut de Luuk holt hett.

As dat bi vele technische Geräte begäng is, gifft dat Kroons, de fohrt ganz sinnig, un annere wedder, dor müsst beus vörsichtig sien un jem ganz suutje stüern. De Kaikroon an Luuk 3 weer as en Porsche mit twee Turboloders. All op den eersten Kontakt ritt he de Lodung hooch or lett se doolsusen. Mit den Utlegger weer dat jüst so. He toppt ruckwies in un leggt ruckwies ut. Sinnig geev dat nich. De Kroonfohrers seten ungeern op düt Gerät.

Im Juli weer't jo Hoochsommer, wi harrn bestimmt dottig Grood in'n Schatten un ünner dat swatte Iesendeck vun de "Tannsteen" weern dat tomindst tein Grood mehr. De Schuerlüüd harrn sik bit op ehre Ünnerbüxen uttrocken. Liekers leep jem de Sweet man bloots so dool un se weern messnatt dörch jemmer anstrengende Arbeit.

Un denn is dat passiert: Op dat Teken vun den Decksmann ritt de Kroonfohrer de Plattform mit 'n Ruck hooch, toppt den Utlegger veel to freuh in, will dat korrigieren, leggt wedder ut un sett de Platt op de Lukenkumming. De Sacken kregen dat Rutschen un de Decksmann schreet gellend in de Luuk dol: "Wohrschau, Ünnerrut!"

Un all de groten Kakao-Büdels fallt rünner in de Luuk. Ok wenn keen Schuermann dropen worrn is, geev dat villicht een Geschree un Geschimp! De Sacken weern all opreten. Un dat hett nich lang duert un ut de Luuk steeg een brune Wulk op, grod as so'n Atompilz. Un denn kemen de Arbeiders öber de Ledder hooch an Deck un güngen op den Decksmann los. De beswöör sien Unschuld un hett op den Kroonfohrer henwiest. För jugendliche Ohren is dat nich west, wat se dor ropbölkt un den Meister an Kopp smeten hebbt. Un he sall man afteuben, wenn eerst Fierobend weer un he dor dool keem vun sien Kroon; denn kunn he orrnlich wat beleben.


Nu blifft he sachs de ganze Nacht dor baven!

De Kroonfohrer harr sik all lang in siene Kanzel insloten. He is denn freewillig noch een gode Stünn no Fierobend op sienen Kroon bleben, bevör he sik boben öber dat Schuppendack verkrümelt hett, wo em jo nüms footkregen kunn.

Wat mi an mehrsten beindruckt hett, dat weer de Sook, dat ut een hellhäutigen norddütschen Minschen, so as du un ik, in so kotte Tiet — un bloots dörch Kakao — een richtigen Afrikoner warrn kann. Un dat Witte in de Ogen un vun de Tehn blinkert denn bi'n Hamborger Schuermann genau so dull, as wi dat bi de Swatten kennt.


"Du siehst sie hier, wie schwarz sie sind..." — ok de "Struwwelpeter" gegen Rassismus!


16.4.2021

 


na baven