Verhauen, verteihn, rund hacken... bi de Zuckerräuben un Runkeln

vun Günter Weber

Ik kiek vun mienen Schriefdisch op den Acker. Buer Alois is mit en groot Gestell tau Gang. Tauminnst 30 Meter Rohrgestänge un Gummischlauch endt na ünnen in Sprüttdüsen. Achtern op den Trecker is de Tank montiert, in den dat Sprüttmiddel schwappt. "Ik sprütt hier tegen alles“, meent de Buer. räubenfleig un anner Getier, awer ok tegen dat "Unkruut" as de Melde. Ik segg nix. An mienen Schriefdisch ankoamen, dink ik dran, woans uns Opa, uns Oma mien ölleren Brauder un ik inne föfftiger Joahr in Meckelbörg op den Räubenacker tau Gang west sünd.

Bi't Sprütten

Nee, Einzelkorn gäv dat nich. Dicht an dicht käm de Räubensaat ut de Ierd. De Reegn wieren lang, so lang. Dat gäv keen sprütten. Man blot grote un lütte Hacken. Un grote un lütte Hannen!

So ordentlich wasst de Räuben hüüt as Einzelkorn ran

Opa hett de Räubenreihen „verhaut“. Üm un bi all 10 Zentimeter bläven etwa 5 – 10 Räuben stahn. De annern hackte hei ut. As Opa nägen lange Reegn „verhauen" harr, kämen Oma un wi twei Jungs op den Räubenacker.

Op de Knei. Inne Hand en lütte Hack. Tüschen de Knei en Reeg Räuben, de Opa hätt stahn laten. Links un rechts ok en Reeg. Vun dat Büschel Räuben, wekke Opa hett stahn laten, müss ümmer en Räuv blieven. De annern sünd uthackt worrn. Na ca. 4 Weeken müssen wi mit de „Rundhack“ Unkraut uthacken. Nie nich sprütten. An't Enn vun den Sommer wiern de Zuckerräuben un Runkeln (Fauderräuben) all so groot, dat sei all „blädert" worrn. De ünnersten Bläder woorn afblädert, zerhackt un anne Schwien faudert. Enen Dag op den annern müss ik uns twee Schwien enen groten Sack vull Bläder gäben.

Grote Räubenbläter sünd lecker för Schwien

Wat wi betahlt kregen? Dat weit ik hüüt noch. Föfftig Pund Weiten un föfftig Pund Haver. Dartau noch 25 Mark. — Wi hebben lange Johr so 8 bet 10 Morgen Räubenacker klaar maakt. Den Weiten hett Bäcker Brand in Bartow kregen. Wi hebbt dat ganze Johr sünndags fröh Weitenbrot eten, trotz Brotmarken. Den Haver hebben uns Schwien as Schrot kregen. Dat Geld kreeg man bloot uns Oma.

Dat wier uns Beschäftigung vun Enn Mai bet so 20. Juni. Dunnemals hebbt wi ok noch Käver un anner Insekten op dat Feld sehn. Vandaag sprütten... sprütten.