Sünnerklaas

vun Meike Balzer-Fraun


De sösste Dezember weer Oma un Opa ehr Hochtietsdag. En Festdag för mi!
Fröh an'n Morgen al de Stevel vör de Huusdöör mit Kringels, Schokolaad, Marzipankantüffeln, Nööt, en Appel un jümmers en lütten Telg vun'n Dannenboom.

För all ehr Kinner un Grootkinner geev dat namiddaags bi Oma un Opa Kaffe un Koken.
In de gode Stuuv harr Oma den Disch opdeckt: Ehr feinet Geschirr mit de Goldkant, de lütten Wiehnachtsengels, en Vaas mit Christrosen, Wasslichten, Japan-Servietten — un jeedeen Kinnertass vull mit Söötkraam. Dat geev Spekulatius, brune Koken, Wickelkoken un Oma ehr Klaben mit Botter un för uns Kinner en Schubs Bohnenkaffe in'n Muckefuck.


Oma ehr Engelorchester hett musizeert. Büxen hebbt se nich an

(Den Deeg för den Klaben maak Oma sülvens, backt worr de aver bi'n Bäcker. Över de Week kreegst du blots en Schiev, wenn du dor en Schiev Swattbroot opleggen deest. Sünndaags harrn wi Klaben mit Mettwust to'n Fröhstück.)

In Bremen un ok in Brundorf, wo uns Dochter groot worrn is, weer ‚Nikolauslaufen' Traditschoon — un is dat jümmers noch.
De Deern un ehr Frünnen drapen sik un öven ehr Leder, Gedichten oder Fleutenspeel. Se högen sik bi't Verkleden mit ole sladderige Kledaasch, Hööd un Mützen. De Sünnerklaas harr fröher keen roden Mantel nich an. Dat is hüüt anners. De Lütten sünd nu meist as rode Wiehnachtskeerls un -deerns ünnerwegens.

An'n sössten Dezember luustert de groten, besünners de olen Lüüd al op de Kinner.
Se hefft en Wasslicht vör de Döör un Söötkraam praat. Appelsinen, Mandarinen, Nööt, grote un lütte Wiehnachtsmanns ut Schokolaad, lütte Tüten vull mit allerhand Snooptüüg, nu ok den niemoodschen Kraam, so wat as Smarties un Co., de Lohn för de Kinner ehr Vördrääg.

As uns Dochter noch ganz lütt weer, fraag ehr en Naversche bi't Nikolauslopen, wat se denn woll vun den groten Töller hebben wull.
"Hast du keine Gummibärchen?"
"Nein, die habe ich nicht."
"Dann möchte ich gar nichts. Danke."
De Gummibärchen kreeg de Deern den annern Dag, as se de Melkkann afhalen dee.

De Nikolauskinner weren ja jümmers heel flietig, man mit de Johren ok ganz plietsch: Draapt sik twee Gruppen vun Kinner bi't Nikolauslopen op de Straat: "Zu Herrn H. geht lieber erst zum Schluss. Da gibt es wieder Apfelsinen!" De sünd ja so wat vun swor...

Een Johr weren wi an'n sössten Dezember nich to Huus, wegen dat wi en Korf mit Söötkraam un en Latücht in uns Autoschuer stellt hefft.
De Korf weer avends nich ganz leddig, un de Navers hefft vertellt, dat de Kinner ehr Leder un Gedichten in uns Vörgoorn opseggt hefft, ehr dat se sik wat ut den Korf utsöcht hefft.

In uns Dörp weer dat to de Tiet pickendüüster. Dorüm sünd jümmers Öllern mit de Kinner mitgahn, meist de Papas. Se harrn en Taschenlamp, hefft de sworen Säck dragen un de Blockfleuten in de Arms vun ehr Jacken warm un dröög holen.

Faken geev dat bi uns noch so'n lütt Sünnerklaas-Naköst mit de Kinner un ehr Öllern. Na veel hitten Kakao, Punsch un Grog un all de söten Saken harrn wi denn bannig Smacht op Botterbrööd mit Mettwust un Kees.

Ik much Tant Lene ehr Smoltnööt to un to geern. Se harr jümmers en ganze Tüüt dorvun för jeedeen Kind praat, un mi hett se dat Rezept geven. Hier kümmt dat:


Tant Lene ehr Smoltnööt

  • 200 g Swiensmolt un 200 g Botter smölten un afköhlen laten.
  • 500 g Zucker, 2 Packjes Vaniljezucker, 10 g Hirschhornsalz (ut de Aptheek),
    1 Ei, 2 cl Rum mit dat Fett vermengeleren.
  • Üm un bi 600 g Wetenmehl dorto geven un dörchkneden. Ünner den halven Deeg 3 TL Kakao kneden.
  • Kugeln dreihen (as so'n dicke Kassbeer oder en lütte Walnutt) un mit veel Afstand op en Backblick mit Backpapeer setten (löppt utenanner!)
  • 15-20 min bi 175°C backen. Afköhlen laten.
  • In en Blickdoos kannst de Smoltnööt kross holen.

Back de nich an en Dag, wo sik Besöök anseggt hett!
Dat Hirschhornsolt rüükt grulich.


5.12.2022

 


na baven