Verswunnen

vun Karl-H. Nissen


Ik heff en Book kregen, to Wiehnachten. Ik harr ja al een, man dat heff ik nich naseggt. Dat nie Book steiht nu up de lütt Komood twischen twee swatte Elefanten. De hett Grootvadder mitbröcht ut Afrika — hett he seggt. De beiden hollt nu dat Book fast. In dat nie Book, dor warrt lütte Stremel vertellt vun Saken, de dat nich mehr geven deit, de verswunnen sünd.

De Schriefmaschin as Bispill is so en Ding, dat mehr un mehr verswindt. Wer schrifft denn noch up en "Olivetti-Reiseschreibmaschine"? Uns Kinner treckt mi hüüt noch up, wenn vun miene Schriev-Künst up so 'n Maschin snackt warrt. "Wat hett Vadder jümmers schimpt bi 't Schrieven, wenn he sik vertippt harr. Toletzt hett he dat Blatt Papier rutreten un is vun vörn anfungen. Man he weer denn fix in Fohrt un dat Schimpen wörr jümmers leger." Dat is vörbi. Hüüt schrievt wi up den Computer un dor kannst du di geern verschrieven. Geiht allens mit en Tastendruck to reguleern.

Agfa-Box. Bild: 32bitmaschine/Wikimedia Commons

Fröher kunnst' dat so männichmal up den Bahnstieg sehn: Mudder stünn dor orrer de lütte Bruut un se winken mit dat witte Daschendook achter den Tog ran un ut dat Finster wink een trüch. Dat geiht nich mehr. De Finster bi de Iesenbahn gaht nich up.

Letzt fünnen wi ennen Schohkarton. Wat dor in weer? Ene Agfa-Box! De Enkelkinner hebbt sik scheef lacht. Dor kunn man mit fotografieren? Se wullen dat nich glöven.


Sünndagskleder sünd keen Spaaß!

As ik lütt weer, dor harrn wi Sünndagskleder. Meist an 'n Sünndag-Namiddag dörven — orrer müssen — wi de antrecken. Un ja nich schietig maken!

To de Tiet hebbt de lütten Deerns bi dat Goden-Dag-Seggen enen Knicks maakt. Wat dat weer? Dat is gor nich licht to beschrieven. De Deerns knicksen so en beten mit de Kneen, geven brav de Hand un möken en fründlich Gesicht. Un de Jungs? De möken enen Diener — meist as so en Dener.
Dat is hüüt allens vörbi. Wenn hüüt en Deern in den Laden kümmt, denn seggt se — villicht — "Hallo".

Aver nich allens is verswunnen, wat in de olle Tiet goot weer. Vör en poor Daag heff ik dat wedder beleevt. Vör mi föhr en Auto, dat wull rechts üm de Eck. Un man mag dat meist nich glöven, de hett mit den Blinker anzeigt!

Un graad nu, bi dat Winterweder, weer dat ok to sehn. Dat gifft ok hüüt noch Lüüd, de feegt den Snee vun den Footstieg vör ehr Huus rünner! Ik heff dat sülven sehn. Ehrlich.


31.1.2010


na baven