Zägenbodder, Zägenmelk, Boddermelk — igitt?

vun Günter Weber

Düsse Zägen geiht dat good. Foto: Martin Jakubowski/Pixelio

Ik will dat eis versäuken, di wat von uns Zägen tau vertellen. Ik bün op de Zägen kamen, wieldat mien Nåber disse Dag sin Fruu as „olle Zääg“ betekent hett.

Wenn hüüt ümmer lamentiert ward, woans uns dat so schlecht geit, denn denk ik trüch an de Tiet, as uns Zägen holpen hebbt, wedder en „Luxusläben“ tau beginnen, „Luxusläben“ dorwegen: wi kregen wedder Bodder op den Disch.

Selma un Erna weeren unse gauden Zägen. Ja, doch so 3 Liter Melk geev elkeen vun de Zägen an’n Dag. Sei sünd morgens un abends molken worrn.

„Igitt, Zägenmelk“, höör ik de Leckertähn, de dat hüüt so leeg geiht.

Jedes Jahr to Paaschen haren se een, mennigmaal ok twei Lämmings. Ostern geev dat Lammbråden. Wedder meckern de Leckertähn vun hüüt, wat för uns en Festdag weer.

De Melk wöör denn ümmer dörch de Zentrifuug dreiht. De Såhn kääm in dat Melkschapp. Dat Melkschapp weer en olles Spind, dat stünn bi de Naversch in’n Keller. Sünnabends harrn wi so an drei bis veer Liter Såhn tosamen.

Botterfatt. Bild: Wikimedia Commons

Un denn wöör de Såhn in dat Fatt stampt. Innen Winter funktioneer dat na korte Tiet. Doch in Sommer, wenn dat so bruddig warm weer, dor heff ik faken twee Stunn’ un ok wat länger stampt. Doch dann harr ik de Bodder fardig.

Seggt dor een „Igitt, de kann een doch nich eten!“? Denn is dat een, den dat hüüt so leeg geiht.

Bottersmolt. Bild: ww/Pixelio

In dat Fatt bleev de lecker Boddermelk mit lütte Bodderklümp. Sünndagmorgens kregen wi drei Bengels elkeen drei Schieven Wittbroot mit Bodder vun uns Selma un Erna. Ik harr giern mehr dorvun hat.

Un de Boddermelk? De geev dat an’n Sünndagavend. Ratz-fatz weer de weg. Mien Leevdag heff ik nich wedder so lecker Bodder un Boddermelk kregen.

Keen Sluck kriegt se runner, de dat hüüt so leeg geiht. Allens vun Zägen, ne doch!

Foto: Martin Jakubowski/Pixelio

Mit Yoghurt mit Früchte or Kefir or wat weit ik för’n fienen Kraam, dormit kannst mi jagen. Dat is wat för de, de dat hüüt so leeg geiht, de so arm sünd. De köönt nich na MacDonalds gahn un en Big Mack un Cola verputzen. Sünd wohrhaftig arm. Orrer?

Aver uns Selma un Erna schamferen, dat köönt se. Wenn ik dat maal vun welk hören schull, denn föhr ik mit de Schleden, dat se nich weiten, wo jüm de Kopp steiht.