Europa 2014

Predigt vun Sabine Stürzer, hollen an'n 18.5.2014


Leeve Gemeend,

annerletzt seet ik mit mien Mann bi Avendbroteeten un keem so mit em in't Schnacken över dissen Gottsdeenst hier hüüt.

Schull üm Europa gahn. Nächsten Sünndag is jo Europa-Wahl un wi söllt dor all fein hengahn.

"Europa?! Wat heff ik dormit to doon? Wat hett Europa in de Kark to söken?", froog mien Mann.

"Europa, dat is doch wat ganz Besünners un wat ganz Junges."

"Wat Besünners? Kannst mi dat mool verkloorn?"

Na, dat is nu 69 Johr her, dat de 2. Weltkrieg ut weer un dat de Freeden dank Europa bit hüüt höllt. Un dormit nienich wedder Krieg in Europa is, söllt wi uns Krüüz mooken. Is dat nich was ganz besünners Scheunes?

"Man nu verkloor mi ook noch, worüm Europa wat ganz Junges is."

Na, so richtig in Gang kamen is dat eerst an 9. Mai 1950. An den Dag is de Europa-Erklärung in Kraft sett worrn. De Politikers in Frankriek weern ganz scheun plietsch: De Minschen in uns Nohborlänner wüssen nich so recht, of se Totruun to uns hebben kunnen, un so keemen se op de Idee, de Wirtschaft miteenanner to verbinnen. Wokeen haut schon sien eegen Kapital twei?

Jo, un wiel dat för alle Sieden Vördele bringt, miteenanner to schnacken un nich Krieg to hebben, is dat mit de Tiet jümmers mehr un mehr worden.

Dorüm is Europa wat Besünners un wat Junges. Un üm allns, wat jung is, mutt man sik good kümmern: Junge Minschen, junge Deerten, junge Planten, dat se good groot warden köönt — un genau dorüm is disse Wahl so wichtig.

Mien Mann is jo vun Huus ut jümmers so en lütt beten skeptisch.

"Wat bringt Europa mi denn? Dat de Gurken nich mehr krumm sien dröffen? Dat se all scheun in een Reeg liggen doot? Is dat de Sinn vun Europa? Hebbt de keen annern Sorgen?"


De Muus maakt sik nix ut, wenn de Gurken krumm sünd!

Op den ersten Blick hett he natürlich recht. Man wenn de Gurken smeckt so as jümmers, se blots en anner Utsehn hebbt, denn ist dat doch nix Leeges. Un een Vördeel hett dat denn ook noch: De Laderuum in den LKW is good utnütt, un an End kann so mennig een LKW-Fohrt spoort warrn. Dat is doch ook al scheun. Weniger Dreck, weniger Larm, Ümweltschutz eben.

"Ümweltschutz! Denn verkloor mi, worüm wi öberhaupt Grööntüüch ut'n Utland hebben mööden."

Nee, bruukt wi eegentlich nich.
Mehrst kööp ik jo ook op'n Wekenmarkt in, man af un an passt dat nich un denn bün ik froh, wenn ik gau mol eben in Supermarkt rinhuschen un inköpen kann. Un de groden Konzerne kööpt eben anners in.
Un wenn dat obends denn wat Leckers to eten gifft, denn is mien Mann ook ganz vernöögt.

"Jo, likers blots bit ik op de Idee kaam un mi en Buddel Beer holen do. Dor hett de EU jo ook de Fingers binn, will dat Reinheitsgebott afkant setten."


Na denn Prost!

Jo, dor mutt ik em recht geven.
Man dat Beer letzt Johr in Dänemark het di doch ook smeckt, oder?
Un mutt man nich af un an en Kompromiss ingahn, wenn man wiederhen good tosomenarbeiten will? Also, för mi as Wiendrinker is dat veel beter worrn, de Toll op den scheunen Rotwien ut Frankriek is veel billiger worrn.
Mi gefallt Europa.

Öberhaupt, dat Reisen is doch veel scheuner worden. Keen Grenzkuntrullen mehr, keen Geld ümtuuschen, keen Krankenschien för't Utland besorgen mööden, nich jümmers ümreeken mööden...

"Du, dat Ümreken hett uns Dochter doch dormols in Öösterriek good doon, weest noch? As wi wedder to Huus weern, kunn se dat 1x7.
Wat mi nich gefallt, is, dat de Priesen bi dat Inföhren vun den Euro gliek bleven sünd, man uns Lohn is ümrekent worrn, weest noch?"

Jo, seh ik jeden Monat wedder op den Zedel, dor hest recht. Ümso wichtiger is dat, to de Wohl to gahn, da dor Politikers in't Parlament kaamt, de för uns lütten Lüüd dor sünd.

"Parlament? Qasselbood för öllerhaftige Politikers, de nüms mehr höörn will!"

Nee, dat wöör ik so nich seggen, ik find düsse "Quasselbood" ganz good, denn "en Köter, de bellt, de bitt nich." Wi hebt nu al meist 70 Johr Freeden hier in Europa, wenn dat nix is!

Wat mi so dörch den Kopp geiht: Wenn de Ukraine in de EU west weer, of Putin sik denn ook dor so rantruut harr? Kiek, Lettland, Litauen, Estland, de leevt doch ganz in Roh un Freeden, de deit nüms wat.
Wenn du mit Früün tosomen steihst, truut sik keener so licht an di ran.

Un wenn de Staaten ünnereenanner mol dat Kabbeln kriegt, gifft dat den Europäischen Gerichtshoff. Kloor gefallt mi nich allns, wat dor urdeelt ward, man beeder, as sik de Köpp intohaun, is dat allemool.

Ik wör mi jo freein, wenn de Politikers sik truun wöörn, öfter mool "Bürgerentscheide" totolooten. Ik bün mi wiss, dat dor mennichmool wat ganz Goodes bi rutsuurn wör.

Denn soooo wiet uteenanner sünd wi mit de Lüüd in de annern Länder gor nich. Mien Fründin mookt bi en Uttuuschprogramm von de Kark mit. Se is nu all en poor Mool mit anner Prädikanten in England west un de Engländers sünd ook al hier bi uns west.
De ingelsche Gottsdeenst is nich veel anners as de hier hüüt morgen bi uns, un so kunnen se scheun tosomen fiern.
Nu is dat bi de Ingländers ook ganz eenfach, sik to verstännigen, liekers mit Lüüd ut anner Länder geiht dat genauso good.

Dorbi fallt mi en lütte Geschicht in, de mien Grootvadder
jümmers vertellt hett:

1916 weer dat, mien Opa weer an de Westfront indeelt. In't Gefecht söcht he Schutz un jumpt in en Eerdlock. Blang bi em harr en anner Suldot de glieke Idee. En Franzoos!
De beiden keken sik an… Beid harrn mehr Bangnis as sünst wat. Nüms truu sik, en Bewegung to mooken…

Bit op eenmool de Franzoos ganz, ganz langsom beid Hannen no boben schuven de. Mit de een Hand lang he gaaaanz langsom in de Tasch vun sien Mantel……
He trock en Bild rut.
Op dat Bild weern en Fruu un twee Kinner to sehn….

Mien Opa verstunn.
Nu trock ook he en Bild vun siene Fruu ut de Tasch.

Beide keken sik an, se bruken keen Wöörd, üm sik to verstahn.

No dat Gefecht sünd se beid ut dat Lock rutkrabbelt un sünd op ehr Sied trüch gahn…


"Nu vertell mi moll, wat hett denn dat ganze Schnacken över Europa mit de Kark to doon?"

Oh, good, dat du mi doran erinnerst. Wi sünd doch hüüt Morgen hierher kamen, üm wat vun Gott siene Wöörd, de in't Bebelbook staht, to höörn.

De Predigttext för hüüt in'n 2. Mose 32 hett ook wat mit Gewalt un mit Freden to doon. Dor is Gott heel un deel fuchtig op de Israeliten vunwegen dat se dat güllen Kalf anbeden dään, wieldes Mose op'n Barg mit Gott togang weer un de teihn Gebotten uthännigt kreeg, wat ja heel wichtig un fierlich weer — un dat Volk harr in de Tied nix Beters to doon as sik en Götzen to maken. Nu is Gott dull in Brass un will de Israeliten ut un all maken. Mose smitt sik för sien Lüüd in de Bresch, so verkamen se ok sünd, un argumenteert un purrt, bet Gott nagifft.

Mi gefallt dor ganz besünners an, dat Gott mit sik schnacken, jo verhanneln lett.Un wenn wi mit Gott verhanneln köönt un en godes Ergeevnis kriegt, denn kann dat doch nich so schwor sien, mit uns Nohbor to verhanneln, üm en godes Ergeevnis to kriegen.

Klor, Mose harr gode Argumente, de muttst schon hebben. Man dat lohnt sik.

Is dat nich en groden Foortschritt, dat, wenn de Völker sik nich ganz eenig sünd, se keen Krieg mookt, sünner sik tosomen sett un de Sook in alle Ruh beschnacken doot? Vun mi ut ook bequasseln doot, Quasseln is jümmer noch beder as Krieg.
Mi is en laue Kompromiss lever as Moord un Dootslag.

Kloor, mennigmool wünsch ik mi ook, dat dat Een or Anner en lütt beten gauer güng — liekers, de Dag ward kamen, an den de Schoolafsluss oder de Berufsutbillen in alle Länder gliek tellt!

"Jo, dor seggst du wat: Denn kaamt de Handwarkers ut de Billiglohnlänner hierher un mookt uns Löhne kaputt. Un denn?"

Denn bruukt wi starke, mutige Gewerkschaften un Politikers, de sik dorför insetten doot, dat de Lüüt in alle Länder en Lohn kriegt, vun den se leven köönt.
Dorüm: To Wahl gahn!!!!!!

Op de anner Siet: Speditionen ut Dänemark hebt ehr Bedriefssitz no Düütschland verleggt. Wieldat bi uns de Sozialafgaven un de Stüürn nich so hoch sünd. Dat bedüüt: Arbeit und Stüürn in Düütschland.
Geiht ook mool annersrüm.

"Nu kumm mi blots nich noch mit de Flüchtlinge un dat wi de vun Italien all hierher halen sallt!"

Moses un siene Lüüd weern ook Flüchtlinge. Al vergeten? Worüm sünd de denn ut Ägypten utneiht?

Worüm goht de Lüü hüüt ut ehr Heimat weg?

Is dat nich en ganz klore Sook för en Christenminschen, de Lüüd in Italien nich mit de Flüchtlinge alleen to looten? De Staaten vun Europa verstaht sik as christlich Wertegemeinschaft!

Sünd wi denn nicht all Bröders und Süsters?

Wat wöör Jesus denn dorto seggen?

"Wullt du Europa mit de 10 Gebote regeern?"

Worüm nich? Dat mutt ik doch glieks mool mien Europakandiaten frogen!

Nee, in Eernst: So ganz langt de 10 Gebote wohl nich. Likers, en goode Grundlaag weern se schon. Un wenn se blots de Grundlaag sünd, üm miteenanner in't Schnacken to kamen.

Un dormit de richtigen Lüüt miteenanner schnackt, mööt wi to de Europa-Wohl gahn.

Dor schnackt denn wohl nich Mose mit Gott, man wenn alle Völker in Europa miteenanner schnackt, is doch al veel wunnen.

"Dor hest recht!"

Amen.


Foto Karkenbinneres: Ewald Eden
24.5.2014


na baven