Flügge

vun Angela Ehlers

Hest ehr sehn, wo schmuck se all weern? Wo stolt, dat se nu grot un flügge worn weern?
Du weest gor ni recht, wen ik meen? Naja, is ja nu ok all wedder een ganze Tied her, siet se utflogen sün, unse Jungs un Deerns.
Ut dree Schooln hebt wi in düsse Fröhsommer wedder `n Barg schmucke junge Lüüd int Leben entlaten. Ganz ünnerschiedli weern se: groote un lüttjere, sölbstbewusste un bangere, ganz kloge un wörke, de dat en lütt beeten schworer hebt, sportliche un langsamere, mit een frecheret Schnutwark un ok stillere, aber alle sünd se op eere Ort tolle junge Lüüd.
Hebt ju sehn, wi se sik utstaffeert haln. Dat weer ehr nich egol, dat nu de groote Avschluss dor weer. Se stünn dor in schmucke Kleeder — tun Deel sölm neiht — un schmieke düstere Antöch. Un de Öllern stünn dorbi, stolt un glückli, dat se weller een Avschnitt mit eere Kinner schafft haln. Grootöllern, Geschwister, Frünn, all freun sik mit.
Un nu geef dat noch veele goode Wünsche un Gedankens mit op den Wech. Vun Anstrengen un nich den Moot verleern, vun Rudern gegen den Strom gegenan, vun Oogen un Ohrn opholn un flietig ween weer dor de Reed un natürlich ok, dat se siks nu dörchbieten mööt in de Lehr un in de niege School.
Du, sech mol — hebt se eegentli all wat kreegen? Sünd se all good ünnerbröcht un könnt eenigermoten dat maken, wat se siks erdrömt hebt? Wi weet dat ni, aber wi wöllt dat höpen.
Wi weet blots eens: wi mööt dorin investeern, in de Köpp un in de Haarten vun düsse Jungs un Deerns. De, weest Du, de sünn dat Wichtigste un dat Grötste, wat wi hebt, unse Jugend.

Wat sechst Du, Du kannst nix investeern, Du hest sölm nix? Du büst all old un hest keen Kraft mehr? Du hest mit Di sölbst all nuch to don?
Hebt wi all, weest wohl! Un liekers könnt wi dor noch `n Barg mehr üm don. Toierst mol dat wichtigste öberhaupt: Wenn dor mol weller so dummerhafti över de schreckliche Jugend vun hüüt schnackt ward, denn könnt wi furts segen: Du, pass mol op, de Jugend vun hüüt is klasse, blots de Tied hett sick ännert und de Jugend müsst dor wohl mit. Wenn wie en beetere Jugend heben wöllt, denn mööt wi dorför Sorg dreegen, dat de Tied beeter ward. Un dat mööt doch wohl wi Grooten, oder wat? Wenn wi dat nich sünd, wat schölt wi denn mit all unse Lebenserfahrung, wo wi jümmers so mit angeben doot? Sieh, un düsse lütte Investischon, de kannst Du doch wohl ok maken, oder? Schnacken kannst doch düchti!

Un de een un anner vun uns, de kann ok noch mehr. De kann den Börgermester un unse Vertreters in de Gemeen ünnerstütten, wat se ok in tokommen Tieden soveel üm de Jugend in Wistedt don könnt as bitherto. Un weest wat, Du kannst ok an meenig Stelln vertelln, wat de Schoolmeesters in unse dree Schooln jedeneen Dach all doot. Wenn Du noch een beeten mehr don wullt, frag doch mol, ob se Di nich bruken könnt förn beeten Uthölp. De hebt nämli so Fördervereens in eere Schooln un de makt jümmers so Projektweeken. Un west Du, villicht söchst Du noch`n Lehrjung oder -deern un denn kunnst ja mol fragen, ob eener wat bi Di warn well.
Un wenn dat all nich Dien Sinn dröpt, denn frag doch mol bi`n Paster, de ünnerstütt nämli ok de Jugend, wo he kann un Pasters hebbt wi ok mehrere int Dörp, dor kannst Di sogar noch wat utsöken.

Hest noch keen Idee, wat Du maken kannst för beetere Tieden för unse jungen Lüüd. Denn must mol mit Dien Naber, mit den Börgermester, den Börgervörstoher, de Baas vun unse Schooln oder mit Gott weet wen schnacken. Ik sech Di, Du warst wat finden un an End warst Di sölm an mehrsten dorto freun.
Wat meent Ju, schöllt wi nich mol een Wettbewerb in unse Gemeen maken?
Wi söökt den fründlichsten Ünnerstütter un de fründlichste Ünnerstütterin för unse Jugend in Hohenwestedt!