Wees fief Minuten still
2. August

Wat staht ji hier den ganzen Dag rüm un doot rein gor nix?

Matthäus 20, 6

En hööchst interessant Geschicht:
De Mann, den en Wienbarg tohöört, geiht mehrmals an'n Dag över den Markt un haalt sik de Lüüd, de dor rümstaht un nix doot.

Is he en Andriever? Warrt he nervöös, wenn anner Lüüd nich an 't Arbeiden sünd? Will he mit de Hannen-Arbeit vun anner Lüüd Geld maken?
Nee, em geiht dat nich üm dat Geld, em geiht dat üm de Oorn. De Oorn is in Gefohr. Dor is seiht worrn, dor is plant worrn, allens is so wussen, as dat sien sull, en ganz Wienbarg hangt nu vull vun Früchte! Süllt de Druven verdrögen? Süllt se affallen un mank Eerd un Steen verdorren?

Wenn wi bedenkt, dat keeneen Arzt blots so rümsteiht, wenn en Cholera-Epidemie utbraken is. Keen Arzt steiht denn mit verschränkt Arms rüm, keen Arzt sett sik denn in en Kino.
In em binnen lüüdt dat Alarm — un he reageert.

Ok de Wienbarg lüüdt Alarm in de Tiet vun de Oorn: De Oorn is dor. Gott hett allens dorför daan.
Wat nu to doon is, is uns Saak, is Saak vun uns Minschen. Wi mööt de Oorn inbringen.

Arbeidt wi al in de Oorn — orrer staht wi den ganzen Dag rüm un doot rein gor nix?
Sorgt wi, dat Minschen rinhaalt warrt in dat Riek vun Gott sienen Söhn, orrer laat wi se buten verdorren?
Een mütt keen Pastor sien, üm wat to doon. Een mütt ok keen Spezialist för Wienbarge sien. Plücken kann jeedeen, in welk Beroop ok jümmers.

Laat uns hüüt nich den ganzen Dag rümstahn un rein gor nix doon.
Verwend du uns!

To'n Anhören hier klicken:

Lesen deit Anke Nissen in Holsteiner Platt.