Wees fief Minuten still
13. Juli


Andacht vun Heinrich Giesen, in Platt bröcht vun Anke Nissen

Dor sä de Herr to Kain: Wo is dien Broder Abel?

1. Mose 4,9

Een kann sik nich alleen vör Gott henstellen, he fraagt uns jümmer na de annern. So wiss, as Gott för den Minschen — een bi een — dor is, so wiss, as Jesus sik üm de Seel vun elkeen Minschen soorgt, so wiss, as sik jeedeen entscheiden mütt, wenn he vör em steiht, so wiss köönt wi aver ok keen Christ sien, ahn dat anner vun uns mitnahmen warrt — to em. Gott denkt siene Kinner tohoop, alltohoop. Dorüm fraagt he Kain na Abel.

Na wen fraagt Gott uns?
He fraagt de, de hier leevt, de "Einheimischen" na de Flüchtlinge,
he fraagt aver ok de Flüchtlinge na de, de hier leevt,
he fraagt aver eerst Recht de Flüchtlinge vun gistern — de in de Twischentiet "Einheimische" worrn sünd — na de Flüchtlinge, de hüüt an de Dören kaamt.

Dat deit weh, wenn wi entdeckt, dat wi uns gegensiedig vergeet, as wi dat up de eersten Sieden vun de Bibel leest. Dat is so, un wokeen sik dorgegen stellt, de is noch düütlicher fraagt: "Wo is dien Broder Abel?". Mann, wo is dien Fru? Fru, wo is dien Mann? Vadder, wo is dien Söhn? Vadder, wo is dien Dochter? Ji Döchter un Söhne, wo sünd juuch Öllern, wo sünd juuch Schwestern un Bröder? Gott will uns alltohoop vör sik hebben. Nehmt wi se mit? Alleen sullen wi nich to em kamen.

Dat geiht üm unsen Gloven, aver ok üm den vun de annern. Gott schickt uns wedder weg un lett uns eerst de annern halen.

O Gott un Herr,
ik will nich alleen selig warrn. Du röppst mi un ok de annern.
Ik will mit se tohoop vör di kamen.
Do diene Wunner an all, ok an de, de ik so swoor lieden kann.


To'n Anhören hier klicken:

Lesen deit Anke Nissen in Holsteiner Platt.


13.7.2008


na baven