Wees fief Minuten still
5. Juni

Mien leve Frünnen!
Vertruut juuch nich elkeen Geist an!
Nee, stellt ehr up de Proov un övertüügt juuch dorvun, dat se vun Gott sünd.

1. Johannes 4, 1 a , Platt na Johannes Jessen

Glöövt nich jedeen Geist!

De, de an een glöövt, hett sik den verschreven. Un den, den he sik verschreven hett, deent he ünner Dwang. Geister hebbt Macht. Se öövt Dwang ut, de Geist vun 'n Terror un de vun de Resignation, de Geist vun den Ehrgeiz un de vun 'n Neid. Vele Geister wüllt uns dwingen.
Se sünd nich vun Gott. Geister vun Gott bringt dat Frie-Sien, nich dat Knecht-Sien.

Wokeen luuthals meent, he is frie un kenen Geist verschreven, de is an 't Biestergahn. Christus hett wüßt, dat wi Minschen in'n falschen Besitt kamen köönt, wat wi dat nu wüllt orrer nich. Dorüm hett he sik veel Arbeit mit Lüüd maakt, de ünner falschen Besitt weern. An de hett he düütlich maakt, dat he uns den rechten Besitter trüchgeven will. He is kamen, dat he uns frie maakt. Siet de Tiet is Christus dorbi, Lüüd, de in falschen Besitt kamen sünd, to heilen. Dat sünd nich blots so 'n Lüüd, de üm sik haut. Dat gifft ok Lüüd, de ganz normal rümloopt un doch "besessen" sünd.

Wokeen besitt uns?
Deit Heilen ok uns not?
Wokeen wull dat afstrieden?

Och du Geist vun Kraft un Stark,
Geist vull Fastheit, frisch un nieg,
maak us knövig to din Wark,
maak us vun den Satan frie,
mööt wi fechten, wies de Richt,
giff uns denn de Waff vun't Licht.

Na Heinrich Held