Wees fief Minuten still
6. Juni

Mien leve Frünnen!
Vertruut juuch nich elkeen Geist an!
Nee, stellt ehr up de Proov un övertüügt juuch dorvun, dat se vun Gott sünd.

1. Johannes 4, 1 a, Platt na Johannes Jessen

Stellt de Geister up de Proov, wat se vun Gott sünd.

Geister sünd üm uns rüm. Se wüllt uns hebben. Stellt se vörher up de Proov. Examineert de Geister. Keen Examen findt statt, ahn dat Fragen stellt warrt. Klore Antworten mütt her. Stellt de Geister — de wat vun uns wüllt — up de Proov, stellt heel präzis Fragen. De Haupt-Fraag is: "Büst du vun Gott?" Dat hett Gretchen al wüsst, as se Faust fraagt hett. An disse Stell scheedt sik de Geister: Kümmst du vun Gott? Wat höllst du vun den Söhn, den Herrn vun de Geister? Wokeen hier de Schullern hooch treckt un seggt: "Jümmers neutraal west!", de is al bi de Gegen-Lüüd. De is nich mehr mit Gott, de is gegen em. Un de is en Saak worrn in de Strategie vun de Ungeister.

Laat uns also de Geister dwingen, dat se sik to kennen geevt. De, de unklor un wirre Antwort gifft, hett sik verraden. Gott snackt nich wirr un unklor. Dor mütt al Bibel, Gesangbook un Katechismus her. Bi' n Examen hett een Böker. Ok bi dit.

Wokeen sik hier sien "Bestahn!" haalt, de is vun Gott. Un den kannst' glöven, un den kannst vertruun! Un denn höört ji keen frömd Geist to, nich mal juuch sülven. Denn bekennt ji as Trost in 't Leven un in 't Starven, "dat ik nich mi sülven tohöör, nee, ik höör mienen truun Heiland Jesus Christus to".

Du heiliges Licht, edler Hort,
laß uns leuchten des Lebens Wort
und lehr uns Gott recht erkennen,
von Herzen Vater ihn nennen.
0 Herr, behüt vor fremder Lehr,
daß wir nicht Meister suchen mehr
denn Jesum mit rechtem Glauben
und ihm aus ganzer Macht vertrauen.
Halleluja.

Martin Luther