Wees fief Minuten still
6. März

Dor nehm Petrus em bi Siet un sett em to un sä:
"Herr, Gott bewohr di dorför! Blots dat nich!"

Matthäus 16, 22; Platt na J.Jessen

"Nee, up gor keen Fall, dat dörv doch nich sien, dat is doch Wahnsinn", so snack Petrus. Wörtlich översett steiht in'n Text: "Dor wees Gott vör." So smitt sik Petrus in den Plan vun sienen Meister.

"Wokeen hett dat denn vun di verlangt? Du sullst di sülven lever schonen! Üm mientwillen bruukst du nich lieden. Wenn du seggst, du müßt deep hendal — schoon di lever, halv deep is genug; ik bün nich in'n Sumpf, ik bün up halve Hööchte; ik bün nich in'n Modder, ik bün noch jümmers up tehmlich fasten Weg."

Man Jesus geiht in den Sumpf un söcht den Modder.

Een mütt sik ja nu irren, Petrus orrer Jesus.
Hett Gott sik irrt, dat he sienen Söhn hengeev, orrer irren wi uns över unsen Standort. Hebbt wi den Moot, un seggt, Gott hett sik irrt?

Orrer markt wi, dat Gott uns dormit — dat sien Söhn lieden müss — den Ort wiesen will, wo wi würklich sünd? Een stell sik vör, wi weern nich dor, wo he uns söcht!

Dit sullen wi an't Krüüz lehrn:
Dat Kennen vun uns Sünden entsteiht nich al dor, wo wi markt, wo lumpig wi sünd,
nee, dat Kennen vun uns Sünden entsteiht dor, wo uns klor warrt, wo dull Gott uns leev hett!

Ik bün dat un min Sünnen,
de laat sik masse finnen,
as Sand liggt an'n Küst:
de hebbt dat ja versehn,
dat du hest heel alleen
un ünner Qualen starven müsst.

Na Paul Gerhardt

To'n Anhören hier klicken: